PROXECTO LIFE COOP CORTADERIA Stop Cortaderia en Galicia
A Asociación Galicia Ambiental forma parte do consorcio de institucións e organizacións que desenvolve o PROXECTO LIFE COOP CORTADERIA Stop Cortaderia, que abarca varias rexións e comunidades autónomas atlánticas de España, Portugal e suroeste de Francia, para o control da invasora Herba da Pampa. O proxecto propón avanzar no control e erradicación de Cortaderia selloana no Arco Atlántico, aproveitando o efecto arrastre do anterior PROXECTO LIFE Stop Cortaderia (2018-2022), para profundar nas leccións aprendidas, ao mesmo tempo que se desenvolven ferramentas para a mellora da gobernanza pública e privada, fronte á invasión de Cortaderia.
Cun orzamento total de 6,3 millóns de euros, Galicia Ambiental pretende executar (no ámbito de Galicia) un investimento próximo aos 400.000, dos que 187.528 serán achegados pola Unión Europea a través de fondos LIFE, entre outubro de 2023 e febreiro de 2028. O Proxecto, no que participa a asociación ambientalista galega, supoñerá a creación dunha decena de postos de traballo periodizándose a incorporación de colectivos de difícil inserción ao mercado laboral.
O PROXECTO LIFE COOP CORTADERIA Stop Cortaderia, que agora comeza, ten así un socio galego que asume directamente a súa execución, co obxectivo de materializar parte do aprendido neste e noutros territorios atlánticos, e colaborar activamente coas administracións locais e rexionais para contribuír a materializar parte dos obxectivos do Plan de acción xa elaborado. O principal obxectivo sitúase agora en mellorar a metodoloxía de control e xestión desta especie invasora dentro do territorio galego xerando un “territorio barreira” para a protección das zonas de interior, onde se buscará a súa erradicación. A educación e sensibilización serán un piar fundamental desta acción no ámbito galego.
![](/html/docs/fondo_1.png)
![](/html/docs/fondo_2.png)
En Galicia, todos os esforzos económicos e persoais nesta fase serán destinados, ademais deao programa de sensibilización, á eliminación da planta en zonas de transición para tentar “confinar” as masas de Cortaderia na franxa atlántica, desde a autoestrada AP-9 ata o mar, e evitar a súa proliferación en espazos de interior. Estas zonas de gran afectación son, principalmente, os municipios do Golfo Ártabro e das Rías de Arousa, Pontevedra e Vigo, cuxo desenvolvemento e “invasión xeneralizada” foi paralelo á creación de grandes infraestruturas como polígonos industriais e novas autovías e rede de alta velocidade. Varios concellos galegos poderanse incorporar ao programa de traballo e conformar unha “rede preventiva de concellos”, principalmente en territorios que se corresponden cos municipios limítrofes coa autovía AP-9 e os seus ramais finais. A zona de actuación prioritaria centrarase nos municipios polos que atravesa e os da marxe esquerda (sentido descendente) do traxecto da Coruña - Vigo.
De forma paralela, actuarase nalgúns dos municipios de interior con zonas de expansión moi alta, en novas vías de comunicación (AVE, AP53…) e en parte dos polígonos industriais do interior que, tras movementos de terra convertéronse en “reservorios” de Cortaderia e novos focos de expansión. Á vez, promoveranse accións de sensibilización cidadá, divulgación entre Comunidades de Propietarios de Chan Empresarial e accións de voluntariado nestas contornas, a través do programa “Voluntariado GA”.
Un piar fundamental desta acción será o desenvolvemento de xornadas técnicas con colectivos cidadáns e, sobre todo, charlas informativas nos centros educativos e formativos da comunidade galega.
Ademais de Galicia Ambiental, este programa inclúe no consorcio asociacións dedicadas a persoas con discapacidade, AMPROS e SERCA (É); asociacións dedicadas á conservación da natureza, SEO/BirdLife (É), e Conservatoired’EspacesNaturels de NouvelleAquitaine (FR); entidades locais, Deputación Foral de Gipuzkoa (É) e a Cámara Municipal de Vila Nova de Gaia (PT); e dous centros de investigación, o Instituto Politécnico de Coimbra (PT) e o IDIVAL do Hospital de Valdecilla, este último traballa na investigación médica das repercusións que para a saúde humana está a ter a presenza de Cortaderia nalgunhas zonas da península ibérica como Galicia.
![](/html/docs/Imagen_de_WhatsApp_2023-11-27_a_las_10.07.54_42f235f6_.jpg)
![](/html/docs/Imagen_de_WhatsApp_2023-11-21_a_las_12.22.04_0ea1fada__.jpg)
![](/html/docs/Imagen_de_WhatsApp_2023-11-21_a_las_12.22.03_2678023a__.jpg)
CAMPAÑA DIVULGATIVA EN CENTROS ESCOLARES
A popular serie de libros “Os Bolechas” será unha das ferramentas do novo PROXECTO LIFE COOP CORTADERIA Stop Cortaderia e busca actuar no plano da sensibilización social ante o problema de especies invasoras como a Herba da Pampa. Será o piar da acción de divulgación entre o colectivo escolar, que se completará con accións extractivas de semente da planta para evitar a súa expansión en xornadas de voluntariado, no ámbito municipal e en áreas afectadas pola planta. Un dos obxectivos da acción divulgativa é erradicar a imaxe “elegante” que o uso decorativo do seu plumeiro ten para unha parte da sociedade, contribuíndo inconscientemente á expansión da semente.
O cómic “O Plumeiro da Pampa, unha planta moi invasora” está editado por Bolanda e Galicia Ambiental, ten como protagonistas aos famosos personaxes que protagonizan os libros “Os Bolechas”. No cómic de Pepe Carreiro reflíctese de forma amena e á vez moi didáctica a “pequena” historia desta invasora en Galicia, as súas consecuencias ambientais e a actitude que a cidadanía debe ter ante esta problemática crecente. Con isto búscase, dunha forma entretida, que os nenos poidan entender mellor a situación das especies invasoras, que sexan conscientes do perigo que conlevan e que saiban como actuar.
CÓMIC OS BOLECHAS
COLABORA COA CAMPAÑA E RECIBE UN EXEMPLAR DE OS BOLECHAS. CAMPAÑA DE VOLUNTARIADO DO PROXECTO LIFE COOP CORTADERIA STOP CORTADERIA EN GALICIA
Se desexas colaborar co noso programa de voluntariado, podes (ademais de inscribirche) facer un donativo de calquera importe mediante Bizum. Se o teu donativo é igual ou superior a 5€ (ti pos o límite), pola túa colaboración con esta acción recibirás vía postal, un exemplar do cómic Os Bolechas “O plumeiro da Pampa, unha planta moi abusona”.
Fai o teu “Bizum”, pulsa en “Facer donativo” e aí introduce o importe (o que desexes achegar) e indica o código 08096.
FACER DONATIVO
Se ademais queres participan nas nosas accións de voluntariado (extracción de semente entre agosto e outubro de cada ano) podes deixar os teus datos nesta ligazón:
Voluntariado
SOLICITA UNHA CHARLA
Cubra o formulario, indicando o día e a hora de preferencia para a actividade. As charlas formativas son impartidas, SEN CUSTO PARA O CENTRO, pola Asociación Galicia Ambiental no marco do programa PROXECTO LIFE COOP CORTADERIA Stop Cortaderia.
Mantemoste informado
Enlaces de interes
![](/html/docs/fondo-life.png)