“Saúde e Clima: Desafíos e Oportunidades”, un encontro sobre a integración da sustentabilidade na saúde
Este venres 17 de xaneiro, expertos e representantes de diversos ámbitos reuniranse na conferencia "Saúde e Clima: Desafíos e Oportunidades. Unha Galicia neutra en carbono en 2040", no Palacio do Carmen en Santiago de Compostela, un evento organizado polo Servizo Galego de Saúde (SERGAS) e a Xunta de Galicia. A xornada abordará os retos e oportunidades que expón a crise climática e o seu impacto na saúde, subliñando o compromiso da rexión coa sustentabilidade.
O encontro será inaugurado por Antonio Gómez Caamaño, Conselleiro de Sanidade da Xunta de Galicia. A continuación, Gemma Teso Alonso, profesora da Universidade Complutense de Madrid, falará sobre a comunicación en tempos de crise climática e como esta afecta á percepción e resposta da sociedade. A media mañá, Beatriz Piñeiro Lago, coordinadora da Estratexia de Economía Circular do SERGAS, liderará unha discusión sobre a sustentabilidade no ámbito sanitario. Nesta charla participarán representantes das áreas sanitarias de Vigo, Lugo, Ourense, Pontevedra, Santiago, Ferrol e A Coruña, que compartirán as súas experiencias e perspectivas sobre como integrar o coidado das persoas coa protección do planeta.
Tras unha pausa, a conferencia retomará a súa actividade cunha mesa redonda titulada "Saúde e Clima: Desafíos e Oportunidades". Este panel reunirá a destacadas figuras como Paula Uría Traba, Directora Xeral de Enerxías Renovables e Cambio Climático, Rocío Mosquera Álvarez, Directora Xerente Galaria EPSS e Elena Villalobos Prats, representante da OMS, xunto con outros expertos en saúde, arquitectura sostible e medioambiente, para debater sobre as estratexias máis efectivas na loita contra o cambio climático como son Cristina García Fontán, arquitecta e profesora na UDC, coordinadora grupo de investigación Persoa Ambiente; Inés Mato Naveira, Subdirectora xeral de Saúde Ambiental e Seguridade Alimentaria; e Pedro J. Marcos Rodríguez, Médico Neumólogo Área Sanitaria A Coruña e Cee.
Na recta final do evento, entregaranse o Premio Climate Challenge HCWH ao Servizo Galego de Saúde en recoñecemento ao seu esforzo por liderar iniciativas sostibles no ámbito sanitario. A xornada concluirá co peche institucional a cargo de José Ramón Parada Jorgal, Director Xerente do Servizo Galego de Saúde.