Plataforma ‘Nostián con Futuro’ contra os cambios na xestión de residuos da Xunta
Varios colectivos ecoloxistas, veciñais e sindicais crearon a Plataforma pola reciclaxe “Nostián con futuro” para defender o modelo da Planta de tratamento de residuos Nostián fronte ás novas imposicións da Xunta de Galicia na planta. A plataforma avoga que estes cambios non son os adecuados xa que “para cambiar esta situación é necesaria unha remodelación de todo o sistema de xestión de residuos”.
Dende hai un tempo, a Xunta quere implantar o modelo da prata de tratamento de residuos de SOGAMA na de Nostián, e que, ademais, instáurese o quinto contedor para envases lixeiros. “Nostián con futuro”, tras observar e comparar os datos de ambas as plantas, posiciónase en contra desta situación. Defende que, segundo datos recolleitos, o actual modelo de Nostián é máis eficiente e ten un mellor funcionamento que SOGAMA, de tal forma que se chega a reciclar ata catro veces máis, polo que non entenden o propósito deste cambio.
A plataforma chegou a varias conclusións sobre esta situación. Para empezar, avisan de que a implantación do quinto contededor só implicaría máis gastos para os cidadáns e unha maior ocupación do espazo público, pero non unha mellora na reciclaxe como o tenta vender a Xunta.
Advirten ademais sobre o “inadecuado funcionamento da planta” xa que, entre outras cousas, “os restos orgánicos do contedor mestúranos cos do contedor de tapa amarela”. E que ademais notaron unha falta de “separación en orixe” debida a que gran parte dos restos orgánicos están a ser tirados ao contedor amarelo.
Así mesmo, outro dos problemas da planta é o destino final do 50% dos residuos que chegan, o vertedoiro. Isto xunto co mal funcionamento pódelle conlevar un “incremento dos custos globais da xestión do lixo”, avisan. Por iso mesmo, cren que “para cambiar esta situación é necesaria unha remodelación de todo o sistema de xestión de residuos”. Para iso, ven imprescindible centrar os esforzos en solucións sustentables como o fomento de compostaxe doméstica e comunitaria, unha mellora da eficiencia na separación en orixe e recollida separada, así como tamén a implantación dunha produción de compost de calidade en Nostián.
A pesar desta necesidade de melloras, está demostrado que o modelo Nostián funciona mellor que o de SOGAMA. A Xunta ampárase en que a lexislación europea e a Estatal obrigan a que se implante o quinto contedor, pero a plataforma explica que non é do todo certa esa obrigatoriedade xa que se permiten outro tipo de recollidas como o modelo porta a porta. Para este non se precisan contedores, o cal ademais din que está “moi estendido por toda Europa, e ofrece os mellores resultados posibles”.
Para cambiar esta situación, a plataforma ten uns obxectivos moi claros. En primeiro lugar, o de promulgar unha xestión ecolóxica do lixo na que se priorice a reciclaxe e a creación de compost de calidade, e non se permita a incineración. En segundo lugar, quere opoñerse a implantación do quinto contedor de envases lixeiros, de modo que se opte por outras alternativas para mellorar o actual sistema de recollida separada.
Do mesmo xeito, quere “defender un modelo de ámbito comarcal para a xestión de lixo na contorna da Cidade da Coruña” e fomentar a educación ambiental como ferramenta para mellorar o modelo de xestión de lixo e promover a compostaxe doméstica e comunitaria.
En quinto lugar “Nostián con futuro” esixe ás administracións “transparencia nos procedementos administrativos vinculados á xestión do lixo” e unha maior capacidade de control e fiscalización á nova concesión. E finalmente defender os postos de traballo da planta de Nostián.
A plataforma é consciente de que en poucos anos a lexislación europea obrigará ás plantas de tratamento de residuos a alcanzar mínimo unha porcentaxe de reciclaxe, o cal tanto Nostián como SOGAMA están lonxe de conseguir cos modelos actuais, así como tamén a supresión do depósito de residuos nos vertedoiros, que de non levar a cabo conlevará sancións. Por iso mesmo, A piden ao Concello da Coruña que solicite a excepcionalidade que prevé a lei e que acordou co Consorcio e por unanimidade no Pleno, e que aínda está a tempo de xestionar.
Actualmente, as entidades forman parte da plataforma pola reciclaxe "Nostián con Futuro" son: Asociación ecoloxista ADEGA, Asociación veciñal, cultural, deportiva e recreativa do barrio da Agra do Orzán, Asociación de vecinos Atochas, Monte Alto y Torre de Hércules, Asociación de veciños Oza Gaiteira Os Castros, Asociación de Vecinos Os Rexumeiros - Castro de Elviña, Asociación de Vecinos Los Rosales, Asociación de Vecinos Monte Martelo, Asociación Vecinos Orzán-Pescadería, Confederación Intersindical Galega, Asociación Vecinal para el Desarrollo Económico y Social - Elviña 2 Fases, Asociación de Vecinos Novo Centro de Matogrande, Asociación Francisco Rodríguez Otero de Labañou-San Roque e Cidade Escolar e Comisión Aberta en Defensa do Común.