Ourense acollerá un Hackathon para impulsar novas ideas de turismo sostible e dixital
Ourense acollerá este mes de outubro o Hackathon Laboratorio de Ideas para Repensar o Turismo, unha iniciativa impulsada pola Deputación de Ourense e o proxecto europeo Polycentric Sustainable Tourism (POST), liderado polo Eixo Atlántico e orientado a propoñer solucións que impulsen un modelo turístico máis sostible, dixital e conectado co territorio
O evento reunirá a mozos talentos, profesionais e emprendedores nun espazo de traballo colaborativo no que se abordarán distintos retos vinculados co turismo do futuro, desde o deseño de rutas intelixentes e multiexperiencia que combinen historia, natureza e tecnoloxía, ata a gamificación cultural e rural como vía para reinterpretar o territorio, así como a mobilidade verde e accesible aplicada ao turismo, a creación de pasaportes territoriais con recompensas dixitais que incentiven a exploración responsable ou a resiliencia fronte ao cambio climático e a recuperación de paisaxes afectadas por fenómenos extremos
O Hackathon desenvolverase en dúas fases complementarias, combinando o traballo a distancia cunha xornada presencial de prototipado e presentación de proxectos. Entre o 13 e o 24 de outubro os equipos participarán nunha fase en liña con formación, mentoría e acompañamento por parte de expertos que os axudarán a definir as súas propostas iniciais. Posteriormente, o 25 de outubro terá lugar no campus da Universidade de Vigo en Ourense o Demoday, unha xornada intensiva na que os proxectos seleccionados se perfeccionarán e presentarán ante un xurado profesional coa posibilidade de recibir orientación directa e validar ideas en tempo real
En total participarán 25 persoas organizadas en equipos multidisciplinares de cinco integrantes con perfís que abranguen desde estudantes universitarios e de formación profesional ata profesionais do sector turístico, startups tecnolóxicas, emprendedores e representantes do ecosistema local. Os mellores proxectos serán recoñecidos con premios de ata 1.500 euros, ademais de mentoría posterior ao evento, oportunidades de financiamento e a posibilidade de pilotar as súas propostas no entorno de innovación de Area101
Os participantes traballarán arredor de cinco áreas temáticas principais orientadas á creación de solucións innovadoras para o turismo: rutas intelixentes e multiexperiencia que integren distintos servizos e actividades; gamificación cultural e rural que fomente a participación en experiencias locais; mobilidade verde e accesible para facilitar desprazamentos sostibles; pasaportes territoriais e recompensas dixitais que promovan a exploración responsable; e resiliencia fronte ao cambio climático mediante a conservación e recuperación da paisaxe natural
O Hackathon forma parte do proxecto europeo POST, financiado polo programa Interreg Espazo Atlántico e liderado polo Eixo Atlántico en cooperación con nove entidades de Galicia, Portugal, Irlanda e Francia. O seu obxectivo é avanzar cara a un modelo de turismo sostible e policéntrico que reduza a presión sobre os destinos máis visitados, mellore o benestar dos residentes e favoreza a cohesión territorial en todo o espazo atlántico
Segundo informan os organizadores, as inscricións estarán abertas ata o 10 de outubro. A cita preséntase como unha oportunidade para co-crear desde Ourense novas formas de entender e practicar o turismo, integrando innovación, sustentabilidade e desenvolvemento local nunha mesma estratexia compartida.
Nesta ligazón está dispoñible o formulario de inscricións: https://101area.com/hackathon_ourense/