Os partidos que concorren o 18F teñen falta de concreción nos seus programas electorais
A falta de concreción e os verbos futuribles do tipo "faremos" dominan as propostas electorais dos distintos partidos que se presentan ás eleccións ao Parlamento de Galicia o próximo 18 de febreiro. Só o BNG incide en propostas ambientais de alta prioridade para Galicia e establece unha lista de prioridades na liña de iniciativas presentadas no parlamento, como a louta contra invasoras ou as relacionadas coa soberanía enerxética.
O Partido Popular de Galicia no seu programa electoral dedica cinco apartados a cuestións ambientais expoñendo primeiro o que fixeron nestes últimos anos e como seguirá mellorando. Os puntos para tratar son a economía circular e a xestión de residuos, a loita contra o cambio climático, a protección do patrimonio natural, a seguridade no mar na que se inclúe a loita contra a contaminación e os recursos naturais.
As medidas máis destacables son tratar de alcanzar unha xestión de residuos climáticamente neutra en 2040 a través do uso de medios de transporte sostibles e a descarbonización dos procesos industriais; e a aprobación da lei do clima en Galicia e a coordinación da loita contra as especies invasoras e o control de especies autóctonas. Así como tamén a proposición do Parque Nacional das Illas Atlánticas como oitava reserva da biosfera de Galicia; a creación de grupos de intervención rápida especializados na loita contra a contaminación e outros accidentes marítimos; e a aprobación da lei de promoción dos beneficios sociais e económicos dos proxectos que utilizan os recursos naturais en Galicia.
Pola súa banda, o Bloque Nacionalista Galego (BNG) manifesta ao longo cinco extensas seccións as súas proposicións de cambio. Estas son biodiversidade e patrimonio natural, xustiza, participación pública e educación ambiental, axenda urbana galega 2030 e prevención e xestión de residuos.
As propostas máis destacadas son o desenvolvemento dun Plan Estratéxico de xestión das Especies Exóticas Invasoras e dun sistema estandarizado de análise de riscos para as especies exóticas en Galicia; a elevación da cota tributaria do Imposto sobre o Dano Ambiental; a ampliación da Rede Natura 2000 para alcanzar unha porcentaxe superior ao 20%; o desenvolvemento unha nova Estratexia Galega de Educación Ambiental; a aprobación, nun prazo máximo de 2 anos, a Axenda Urbana Galega 2030; e, en canto a xestión de residuos, a revisión da normativa e desenvolvemento dun novo Plan de xestión dos residuos industriais.
O Partido Socialista de Galicia, en cambio, céntrase principalmente nas enerxías renovables e na aprobación dun Plan Estratéxico de Enerxía sostible para Galicia. No seu programa electoral tan só dedícalle sete puntos, non seccións, ás enerxías limpas a modo de puntos sobre o medio ambiente.
Sumar Galicia dedica tres apartados ao medio ambiente que profundan sobre o medio natural e a biodiversidade, a emerxencia climática e sustentabilidade. No primeiro bloque avógase pola protección do medio, é dicir, os espazos protexidos, o mar e a súa biodiversidade, os ríos e humidais, os bosques e a fauna, sen deixar de lado ás especies invasoras. No segundo, propón unha nova Lei Galega do Cambio Climático e Transición Ecolóxica. E finalmente, expón as súas propostas para a xestión pública da auga, novos plans de xestión e prevención de residuos e a revisión do estado do sector da minería.
Podemos Galicia, doutra banda, optou por un gran bloque ao que chamou ecoloxismo. Nel, abarca un novo modelo territorial, a mobilidade sostible, un novo modelo de xestión de residuos, a preservación da biodiversidade e a sustentabilidade enerxética. Destacando tamén a proposta dunha Lei Galega de Mitigación e Adaptación ao Cambio climático e a aplicación da Axenda 2030 e os Obxectivos de Desenvolvemento Sustentable.
Doutra banda, Vox dedica un pequeno apartado no seu programa electoral ao medio ambiente e á xestión forestal no que expoñen “medidas urxentes” como a paralización da Lei do Clima, así como a derrogación de todas as leis como a de Benestar Animal. Tamén propoñen fortalecer o sector forestal galego e protexer as paisaxes galegas ante as especulacións co patrimonio e a forma de vida.
Finalmente, Democracia Ourensana, nun bloque no que se xunta obras, auga, parques e medio ambiente, avoga por plantar 10.000 árbores, rehabilitar o vertedoiro de Eiroás e acondicionar os paseos fluviais dos ríos Miño, Barbaña, Barbañica e Lonia.
Aquí tendes a ligazón aos programas electorais medioambientais completos: https://galiciaambiental.org/h...