Os encoros galegos permanecen estables a pesar da continua baixada da reserva nacional
Os encoros galegos seguen estando ao redor do 65% a pesar das altas temperaturas que sufrimos esta última semana. Neste tempo a baixada foi pequena o que está a permitir que continuemos tendo auga suficiente. Polo momento, a conca Miño-Sil (administrada polo Estado) atópase ao 65,6% da súa capacidade total, cuns 1.988 hectómetros cúbicos (hm³). Se o comparamos coa semana pasada, sufriu unha baixada do 1%, moito menor que anteriores semanas.
Doutra banda, a conca Galicia Costa (administrada pola Xunta de Galicia) baixou por baixo do 65%, estando nestes momentos ao 64,5% da súa capacidade total, cuns 441 hm³. Dende a semana pasada, en contraste coa conca Miño-Sil, baixou un 2%. A diferenza do último informe que publicamos, o descenso está a ser menor pero non por iso hai que refugar a auga xa que é un ben moi prezado.
En canto á reserva hídrica nacional, esta atópase ao 39,9% da súa capacidade total, cuns 22.379 hm³ de auga. Na última semana, estes descenderon un 1,2%, o que supón uns 675 hm³, unha cifra cada vez máis preocupante.
O descenso está xeneralizado, pero, aínda así, algunhas concas continúan por encima do 65%, entre elas as xa comentadas galegas. As outras son as concas do Cantábrico Oriental e Occidental, e as concas internas do País Vasco. As máis preocupantes pola súa baixa porcentaxe (menos do 30%) son as de Guadiana, Guadalete-Barbate, Guadalquivir, conca Mediterránea Andaluza, Segura e as concas internas de Cataluña.
Estas cifras débense ás moi escasas precipitacións na vertente Atlántica e case nulas na Mediterránea. A máxima produciuse en San Sebastián - Donostia con 8,5 mm (8,5 l/m²).