O mel dos montes de Laza acada a distinción de ouro na LONDON HONEY AWARDS 2023, por medio do produtor local Aialma
Tódolos anos ao chegar o mes de maio a LONDON HONEY AWARDS distingue os mellores meles do mundo, en diferentes categorías. Nesta edición, outra vez, Mel de Aialma por segundo ano consecutivo, acada a categoría de ouro para un dos seus meles, o mel de flores silvestres. O ano pasado foi o Monofloral de Castiñeiro.
«Apostar por meles monoflorais obríganos a estar moi atentos a cada época do ano, para cada tipo de mel, hai que estar moi pendentes da floración e do manexo das colmeas, hai que seguir o ritmo da natureza. Primeiro facémolo para as uces, avanzada a primavera coa silveira. Poñemos especial esmero cando florecen as candeas do castiñeiro, xa que este tipo de mel é dunha calidade e sabor excepcional, e esta calidade é pola que apostamos en Aialma. Cara o final do verán facémolo coa melaza dos cerquiños, o zume dos nosos carballos». Desde o concurso, que recibe meles de todo o mundo, valoraron o mel Aialma cunha calidade excepcional polo que obtivo o premio de Ouro dende a capital inglesa.
Aialma recolle o proxecto de José Antonio “Ñaka” e Lucía que fai uns anos decidiron voltar o rural e apostar por sacar un proxecto de compromiso co territorio e o patrimonio, que lles permitira vivir no lugar do que proceden. «Para Aialma esta distinción é un recoñecemento ao traballo iniciado e de satisfacción, o que nos motiva a medrar neste proxecto. Nestes momentos estamos asentando os alicerces para, en xa, dar o salto á apicultura profesional. Vimos da produción primaria e con este cambio queremos desenvolver a idea de elaborar e comercializar meles “de autor”, con pequenas producións moi escollidas que buscan a mellor das calidades e excelencias. Ese é o noso obxectivo. Agora estamos en moitas das principais feiras galegas e en venta directa, mais o proxecto avanza cara unha maior profesionalización. O feito de ter acadado estas distincións é o que nos anima a coller este camiño da apicultura profesional».
A idea principal de Aialma vai máis alá de elaborar este mel de autor, «queremos un proxecto con “alma”, que exprese un compromiso con manter e vivir do noso territorio, nomeadamente dos nosos montes de Laza e do Macizo Central». Os montes de Laza, do Macizo Central, destacan por unha inconmensurable riqueza natural, na que persiste aínda unha apicultura tradicional de pequena escala, con moita xente maior que aínda ten nas leiras próximas ás casas algunha colmea e pequenas producións de mel.
No Macizo Central a apicultura é un patrimonio que se remonta de moi antigo e a maior parte dos vestixios que existen esmorecen esquecidos. Existe un patrimonio arquitectónico totalmente descoñecido, cunha concentración de alvarizas, que pasa por ser do máis interesante do noroeste peninsular. En tempos a principal función destas alvarizas era proporcionar cera para Monterrei, para a Catedral de Ourense, para os Milagros. Antes esta apicultura estaba presente ao longo de todo o Macizo Central, e aínda é posible atopar algún trobo (antigas colmeas feitas con táboas de castiñeiro) esquecidos en vellas alvarizas de pedra con varios séculos de antigüidade.
«Aialma quere perpetuar o elo entre este pasado e as seguintes xeracións. A recuperación de alvarizas, a súa localización e inventario, e poñelas a funcionar novamente ocupan unha parte do proxecto Aialma, e todo iso queremos que se perciba mediante o mel que producimos, no que se plasma o sabor da nosa paisaxe e se valora máis alá das nosas fronteiras».
Para máis información consulte o seguinte enlace ou contacte con José Antonio Pazos “Ñaka” (686278489).
https://www.londonhoneyawards.com/awards-results-2023/Aialma-honey/