O medio ambiente en Galicia continúa nun segundo plano
Cadena Ser en Galicia realizou un debate sectorial sobre o medio ambiente no que participaron Ángeles Vázquez (PPdeG), Elena Espinosa (PSdeG) e Rosana Pérez (BNG) baixo a moderación de Ricardo Rodríguez. O debate, a pesar de formular varios asuntos de interese ambiental, derivou a cuestións que pouco tiñan que ver cos asuntos formulados polo moderador. Como se puido comprobar durante a campaña electoral, o medio ambiente está a pasar absolutamente desapercibido das propostas electorais, só as interesadas propostas en materia de eólica parecen gañar espazo relativo.
Algo máis da metade do debate, unhas tres cuartas partes para ser exactos, pivotaron ao redor dun só tema, o caso Toconao, quitando así espazo a outras cuestións relevantes en materia ambiental.
Polo momento, poderíase destacar que Ángeles Vázquez defendeuse mellor das acusacións no debate que nas entrevistas realizadas por medios de toda España ao longo do mes de xaneiro… e tentou converter o defecto en virtude mentres era acusada de mentir polas outras dúas invitadas, Elena Espinosa e Rosana Pérez. Expuxo como “solucións” a futuros accidentes análogos un comité científico e o voluntariado ambiental, mentres continuaba botando culpas ao goberno central por competencias que eran da autonomía.
Tanto Pérez como Espinosa acusaron a Ángeles Vázquez e á Xunta de non exercer as competencias autonómicas na crise dos pélets, así como de tentar mentir e enganar á xente sobre a información que tiñan respecto diso. Pola súa banda, Ángeles Vázquez tentou escudarse nas competencias mariñas do Goberno xa que, segundo indicou, estas son da Xunta a condición de que “o residuo vai de terra a mar, non de mar a terra”. E reiterou que será a fiscalía a que dirima as responsabilidades.
Desde o BNG, ademais de agradecer o labor dos voluntarios, denuncian a responsabilidade política ao “non levar a cabo a xestión desta catástrofe exercendo as súas propias competencias”. Pérez evidencia tamén que a vicepresidenta se reclame a falta de competencias do Goberno central cando “nin a propia Xunta de Galicia exerceunas”.
A número uno do PSdeG por Pontevedra denunciou o trato da Xunta cos concellos, como exemplo esclareceu que ao concello de Vigo chegoulle un correo dicindo que asumisen eles a limpeza as praias. “Ao final todos teñen a culpa excepto quen ten as competencias, como é a Xunta”, declarou Espinosa.
A deputada do BNG, Rosana Pérez, en consonancia con Espinosa expuxo, “non só non atenderon á planificación da sociedade civil nas praias, que se tiveron que auto organizar, senón que abandonaron absolutamente aos concellos. Abandonáronnos e ademais permitiron o uso de dar ordes, porque recibiron, a primeira comunicación que tiveron da Xunta foi unha carta do conselleiro do mar onde indicaba o que tiñan que facer, pero nunca implicándose a consellería do mar”. E engadiu, “concellos pequenos, que non teñen medios, víronse absolutamente desbordados pola incompetencia da administración que debería tomar man neste asunto, que é a Xunta de Galicia”.
Isto, no canto de continuar falando dos problemas ambientais que ten Galicia, derivou nun conflito sobre as necesidades dos mariñeiros. “Nós temos as competencias para estar á beira dos mariñeiros, para salvar as vidas dos mariñeiros e para facer as inspeccións, e para iso destinamos 22 millóns de euros”, expuxo a vicepresidenta Ángeles Vázquez.
Con gran enfado, Rosana Pérez quíxolle lembrar a “axuda de 550 euros a pago único por mariscador ante a crise que están a ter” xa que “para estar á beira dos mariñeiros levades 15 anos téndoos abandonados para agora tentar quitar redito a unha crise que vós fixestes máis grande do que foi”.
En xeral, durante o debate, todo o falado en cuestión de propostas ambientais foi moi xenérico e usando frases feitas, facendo ver que o medio ambiente segue sendo un segundón dos debates e na política. E así continuou coas propostas de cada partido.
“O partido socialista está disposto a facer un esforzo en temas ambientais para poñer a Galicia cabeza de España e se pode ser cabeza de Europa. E traballar en todos os ámbitos desde Rede Natura, forestal, biodiversidade, enerxía etc., porque creo que xa non é unha opinión o tema de traballar o cambio climático, é unha obrigación que temos coas xeracións futuras”, declarou Elena Espinosa.
Pola súa banda, Rosana Pérez expuxo que habería que crear un órgano que coordinase todos os ámbitos do medioambiente. E finalizou, “Nós temos un programa con propostas serias e realistas, empezando pola redución das emisións e o aumento de zonas de Rede Natura”.
Como punto e final do debate, Ángeles Vázquez afirmou que o Partido Popular ten un obxectivo para esta lexislatura, “imos ser a gran capital natural e faremos o posible para que desde Europa sexamos recoñecidos como o gran e verdadeiro refuxio climático. Seguiremos impulsando a enerxía verde con sentido común, e o supremo acábanos de dar a razón ante os que din Enerxía verde Si pero non así, hai formas de facelo e vímolo demostrando”.
Deixámosvos a ligazón do debate completo aquí: https://cadenaser.com/audio/1707160988528/