O Grupo Naturalista Hábitat e Ecoloxistas en Acción A Coruña volven alertar do perigo que supón o festival Wake Up and Dream ao medioambiente
Como xa anunciaramos o mes pasado, na Coruña e con permiso do concello e da Xunta de Galicia, realizouse os días 14 e 15 de xullo un festival de música chamado Wake Up and Dream no parque Bens, unha zona protexida. Desde antes do mes de xuño os grupos ecoloxistas Grupo Naturalista Hábitat e Ecoloxistas en Acción A Coruña presentaran unha serie de alegacións ao concello polo perigo que este festival podía supoñer á flora e á fauna do parque estando múltiples especies en perigo polo ruído e polas condicións nas que podía quedar o parque despois dun festival de tan envergadura.
É por iso polo que ao haber o concello continuado coa celebración do festival e desatendendo as queixas dos colectivos ecoloxistas, ambos os grupos decidiron ir comprobar as condicións nas que se atopada o parque unha vez empezado a montaxe do festival e unha vez este comezou o pasado 14 de xullo. Alí atopáronse co uso de maquinaria pesada no parque usada para transportar os escenarios e demais instalacións do festival.
As medicións realizadas días antes do festival (12 de xullo) revelaron que os niveis de ruído superaban o límite permitido pola lei de ruído do parque. Lembramos que o parque foi clasificado como zona de especial protección acústica para evitar perturbar a fauna local. Neste sentido, os grupos ecoloxistas afirman que o estrés que pode causar o festival ameaza a cría de varias especies xa que, segundo as previsións, durante o festival espéranse ruídos de maior intensidade por encima dos 100 dicíbeis (dB).
Pero non só preocupa o ruído, senón tamén o lixo e os danos causados pola actividade humana, xa que poden deixar unha pegada significativa tanto na área do festival como nos arredores, afectando as áreas silvestres e renaturalizadas do parque. Estamos a falar dun festival que, con todo o que isto implica, reuniu a 50.000 persoas na súa edición anterior, e prevese que esta edición atraia a milleiros de persoas cada día no parque.
Ademais, afirman que non lograron obter información sobre o informe ambiental do concello pola negativa deste para compartilo. É importante destacar que o informe mencionado é esencial para avaliar os efectos do festival nunha contorna natural como o parque de Bens e a súa contorna, incluíndo as illas de San Pedro, un espazo natural de interese local proposto polo Concello da Coruña.