O Goberno abre expedientes informativos a Iberdrola e Naturgy por posibles baleirados de encoros
O Goberno investiga a Iberdrola e Naturgy por posibles manobras na operación dos seus centrais hidroeléctricas para beneficiarse da escalada no prezo da luz. O Executivo abriu expedientes informativos ás dúas compañías para investigar o baleirado de encoros que provocou as críticas da ministra de Transición Ecolóxica, Teresa Ribera, quen dixo estar escandalizada polo sucedido na presa de Ricobayo, en Zamora, operada por Iberdrola. A ofensiva do Executivo afecta a catro instalacións galegas: os encoros de Belesar e Salas, operados por Naturgy; e os de Cenza e As Portas, xestionados por Iberdrola.
O secretario de Estado de Medio Ambiente, Hugo Morán, advertiu hoxe de que a realidade do cambio climático, o aumento das temperaturas, a alteración dos patróns de choiva e a menor dispoñibilidade de auga que auguran todos os escenarios a medio e longo prazo, afectará os usos nas distintas concas hidrográficas e aos dereitos de explotación e de aproveitamento dun recurso cada vez máis escaso. Este xoves convocouse unha reunión por mor mor da situación creada na comarca polo baleirado do encoro por parte de Iberdrola, a empresa concesionaria do título para o seu aproveitamento hidroeléctrico.
A apertura dos expedientes anticipouna Morán, durante unha visita a Zamora, territorio afectado polo baleirado do encoro de Ricobayo. Alí mostrouse partidario de comprobar se houbo mala praxe na actuación de Iberdrola. O secretario de Estado de Medio Ambiente subliñou que nuns días coñeceranse os pormenores do expediente informativo que abriu a Confederación Hidrográfica do Douro e poderá determinarse se Iberdrola excedeu os límites de desembalse para turbinación que lle están permitidos. Se se comproba mala praxe,abriríaselle un expediente sancionador. Tamén apuntou a problemas noutros enclaves que derivaron na apertura de máis expedientes, en referencia ás presas galegas e á investigación sobre Naturgy.
Morán explicou aos alcaldes que a planificación hidrolóxica de terceiro ciclo deseñada polo Ministerio para a Transición Ecolóxica e o Reto Demográfico (MITECO) para o período 2022-2027 contempla medidas de adaptación ao cambio climático e criterios de xestión ambiental para cada demarcación. Os novos plans hidrolóxicos de conca atópanse en fase de consulta pública ata o próximo 31 de decembro. Ademais, sinalou que este é o momento de incorporar novas garantías e límites ecolóxicos de caudais mínimos a todas as masas de auga para atender á realidade do cambio climático e escenarios de redución da dispoñibilidade hídrica en España.
Morán subliñou que, calquera que sexan as cláusulas establecidas nas concesións hidroeléctricas en vigor, estas estarán tamén sometidas á maior ou menor dispoñibilidade de auga en cada momento. Será esa dispoñibilidade a que condicione o aproveitamento económico dos encoros en España. Ademais, o secretario de Estado anunciou para o mes de setembro unha próxima reunión do MITECO con representantes da Federación de Asociacións e Municipios con centrais hidroeléctricas (FEMEMBALSES) para estudar posibles medidas preventivas de episodios como o de Ricobayo en todo o sistema nacional de encoros de uso hidroeléctrico, e mesmo unha eventual revisión da Lei de Augas.