Galicia Ambiental inicia a campaña educativa do proxecto LIFE Coop Cortaderia da man de “Os Bolechas”
A Asociación Galicia Ambiental inicia o 1 de marzo a campaña de educación ambiental e sensibilización, en centros educativos, enmarcada no programa LIFE Coop Cortaderia, proxecto europeo no que participan as comunidades do arco atlántico de Portugal, España e Francia, a través de asociacións, universidades e administracións públicas que, no caso de Galicia, vai ser desenvolvida pola Asociación Galicia Ambiental. Nesta acción, vanse visitar parte dos colexios galegos para mostrarlles os perigos das especies invasoras, como a herba da pampa, tanto para o territorio como para as persoas. As actividades, contarán cun material formativo baseado nun cómic de "Os Bolechas", e están dirixidas a estudantes, especialmente aos de 5º e 6º de primaria e de 1º e 3º da ESO.
O cómic “Invasoras: O Plumeiro d Pampa, unha planta moi abusona” é o primeiro dunha serie que estará dedicada a algunhas das especies invasoras que poñen en maior risco a biodiversidade galega, empezando pola Herba da Pampa. Editado por Bolanda e Galicia Ambiental, ten como protagonistas ao famosos seis irmáns que protagonizan os libros “Os Bolechas”. No cómic de Pepe Carreiro reflíctese de forma amena e á vez moi didáctica a pequena historia desta invasora en Galicia, as súas consecuencias ambientais e a actitude que a cidadanía debe ter ante esta problemática crecente. Con isto búscase, dunha forma entretida, que os nenos poidan entender mellor a situación das especies invasoras, que sexan conscientes do perigo que conlevan e que saiban como actuar.
A actividade en centros educativos e formativos da comunidade galega está dirixida ao público infantil e xuvenil, especialmente de 5º e 6º de Primaria e 1º a 3º de ESO. Esta virará ao redor do material didáctico e do cómic popular “Os Bolechas”, que se converten na "canle de comunicación" cos escolares. Un dos obxectivos principais é o de erradicar a imaxe “elegante” do uso decorativo de especies invasoras como o plumeiro, que persiste nunha parte da sociedade, contribuíndo á expansión da semente.
A popular serie de libros “Os Bolechas” será unha das ferramentas do novo proxecto LIFE Coop Cortaderia que busca actuar no plano da sensibilización social ante o problema de especies invasoras como a Herba da Pampa. Esta acción europea aséntase en Galicia en tres piares: divulgación entre o público escolar, accións extractivas de planta para evitar a súa expansión ao interior de Galicia e xornadas de voluntariado no ámbito municipal en áreas afectadas pola planta. O cómic estará dispoñible tanto en formato físico como en soporte dixital, que se poderá atopar na web de Galicia Ambiental.
Os centros educativos poderán fixar directamente a súa data de participación (charla e actividade formativa) mediante o formulario web do proxecto: https://galiciaambiental.org/lifecoopcortaderia
Esta actividade é gratuita para o centro escolar tanto a charla como os talleres prácticos que se poidan chegar a realizar asociados a ela.
Proxecto LIFE Coop Cortaderia en Galicia
A asociación Galicia Ambiental forma parte do consorcio de institucións e organizacións que desenvolverá o programa LIFE Coop Cortaderia + que abarca varias rexións e comunidades autónomas atlánticas de España, Portugal e suroeste de Francia para o control da invasora Herba da Pampa. O proxecto propón avanzar no control e erradicación de Cortaderia seollana no Arco Atlántico aproveitando o efecto arrastre do anterior LIFE Stop Cortaderia (2018-2022) para profundar nas leccións aprendidas, ao mesmo tempo que se desenvolven ferramentas para a mellora da gobernanza pública e probada, fronte á invasión da Cortaderia.
Cun orzamento total de 6,3 millóns de euros, a Asociación Galicia Ambiental pretende executar un investimento próximo aos 400.000, dos que 187.528 serán achegados pola Unión Europea a través de fondos LIFE, entre outubro de 2023 e febreiro de 2028. O proxecto presentado pola organización ambientalista galega supoñerá a creación dunha decena de postos de traballo, priorizándose a incorporación de colectivos de difícil inserción ao mercado laboral.
O proxecto LIFE Coop Cortaderia + ten así un socio galego que asume directamente a súa execución, co obxectivo de materializar parte do aprendido en leste e outros territorios atlánticos e colaborar activamente coas administracións locais e rexionais para contribuír a materializar parte dos obxectivos do Plan de acción xa elaborado. O principal obxectivo sitúase agora en mellorar a metodoloxía de control e xestión desta especie invasora dentro do territorio galego xerando un “territorio barreira” para a protección das zonas de interior, onde se buscará a súa erradicación.