Galicia aínda ten auga suficiente a pesar da baixada do nivel dos encoros polas altas temperaturas
Os encoros galegos empezan a minguar pola chegada do verán e as altas temperaturas. Do mesmo xeito, debido ás últimas precipitacións, o descenso da capacidade non é o mesmo en ambas as zonas galegas habendo descendido máis na zona chamada Galicia Costa. Polo momento aínda non son cifras moi preocupantes xa que seguen por encima do 65% de capacidade total, pero hai que ser cautos co gasto da auga.
Actualmente, a conca Miño-Sil (administrada polo Estado) atópase ao 68,6% da súa capacidade total cuns 2.079 hectómetros cúbicos (hm³), un 3,2% menos do que estaba o pasado mes de xuño. En cambio, na conca Galicia Costa (administrada pola Xunta de Galicia) a situación é bastante distinta. Nestes momentos atópase ao 69,3% da súa capacidade total cuns 474 hm³, un 9,2% menos que o mes pasado e un 2,8% menos en comparación coa semana pasada. En comparación coa outra conca esta sufriu máis as altas temperaturas. A pesar diso, como podemos comprobar, a conca Galicia Costa sitúase por encima en canto a capacidade que a Miño-Sil cun 0,7% máis.
En canto á situación nacional, a reserva hídrica española, segundo informou o Ministerio de Transición Ecolóxica e o Reto Demográfico no seu informe semanal, atópase ao 44,7% da súa capacidade total, almacenando nos encoros uns 25.043 hm³ de auga. As precipitacións afectaron á vertente Atlántica e foron escasas na vertente Mediterránea, sendo a máxima en precipitacións produciuse en San Sebastián – Donostia con 17,3 mm (17,3 l/m²).
No último mes sufriu unha baixada dun 2,8% debido ás altas temperaturas e á onda de calor que comezou a semana pasada e que está a superar récords de temperatura en gran parte do país. A maioría das concas minguaron notablemente se as comparamos co mes de xuño excepto a Conca do Cantábrico Occidental que se mantén igual e as Concas internas de Cataluña e a conca do Ebro que aumentaron un pouco debido ás grandes precipitacións que tiveron a semana pasada. En canto aos descensos, os máis preocupantes son os das concas do Guadiana, Guadalete-Barbate e Guadalquivir que se atopan por baixo do 30% das súas capacidades totais.