CEIDA inaugura os Encontros Axenda 2030
O Centro de Extensión Universitaria e Divulgación Ambiental (CEIDA) creou os Encontros Axenda 2030, un evento para fomentar o debate e a reflexión. Este mes está dedicado á conservación das paisaxes para a natureza e as persoas. O acto realizarase o venres 24 de novembro de 11 a 13 horas no Castelo de Santa Cruz, en Oleiros, e contará coa visita de dous referentes da conservación en España, Jordi Sargatal e Miquel Rafa.
O obxectivo deste primeiro encontro é “destacar a importancia e a necesidade de conservar o noso patrimonio natural”, explica o centro. Para iso, queren achegar á xente a “experiencia de persoas que levan moitos anos traballando neste ámbito desde diferentes entidades”.
Este novo espazo comezará coa inauguración do mesmo por parte do director do CEIDA, D. Carlos Vales Vázquez ás 11:00. A continuación, sobre as 11:15, comezará a primeira charla do evento, ‘Educación e sedución ambiental’, impartida polo director xeral do Grupo Mascort, D. Jordi Sargatal i Vicens.
Sargatal é un experto no tema con máis de 50 anos de experiencia na investigación e preservación da natureza. Está especializado en aves, zonas húmidas e xestión do territorio, e tamén foi director do Parque Natural de Aiguamolls de l'Empordà e da Fundación Territori i Paisatge. Ademais, é coeditor de Handbook of the Birds of the World, un libro de 17 volumes que analiza e ilustra todas as especies de aves do mundo.
A seguinte charla do encontro, dedicada á ‘Conservación da natureza: paisaxes, natureza e persoas’, comeza ás 11:45 e estará impartida polo director de Territorio e Medio Ambiente na Fundación Catalunya – A Pedrera, D. Miquel Rafa Fornieles.
Rafa é un biólogo especialista en conservación da natureza que conta con máis de 30 anos traballando en Ong a nivel internacional. Ademais, é presidente do Consello de Protección da Natureza de Cataluña e membro da Comisión Mundial de Áreas Protexidas da Unión Internacional para a Conservación da Natureza (UICN – WCPA).
Para finalizar o evento, sobre as 12:15, abrirase un diálogo entre os poñentes, moderado polo director-xerente do CEIDA, D. Carlos Vales, ‘Conservando as paisaxes para a natureza e as persoas’.
Tal e como informou o centro, o evento é de carácter presencial e, para os que non poidan asistir, poden seguilo online por Zoom. Este encontro e os seguintes contan coa participación da Deputación da Coruña a través do programa ‘Para unha Transición Ecolóxica’.
Para máis información pode visitar a seguinte ligazón: https://www.ceida.org/gl/formacion-gl/encontros-axenda-2030-conservando-as-paisaxes-para-a-natureza-e-as-persoas