Axudas danos do lobo
Denuncian o escaso prazo para xustificar as axudas para a prevención de danos por ataques do lobo
Só unhas horas de prazo para tramitar os xustificantes e non perder a subvención para adquirir equipos e medidas para previr danos
04-01-2018
O Colectivo Beealia denuncia a redución do prazo para xustificar as axudas para a prevención de danos por ataques do lobo a explotacións gandeiras ata límites que parecen de fición, ó permitir só unhas horas para tramitar estas xustificacións.
O pasado 26 de decembro ás 10:10 horas da mañá unha gandeira que decidiu tramitar as axudas para a prevención de ataques de lobo a través de Beealia contactaba co colectivo para alertarlles do seu caso e do escaso marxe co que contaba para xustificar a axuda. Ás 10:00 horas pasou o carteiro para entregarlle unha carta certificada. Nesa carta aprobábaselle unha axuda por 1.400 euros para mercar dous pastores con placa solar e 8 mallas electrificadas para protexer o seu gando. Ata aquí todo correcto, pero o prazo para xustificar dita axuda remataba ese mesmo día 26 de decembro. Tendo en conta que vive no rural, onde os únicos rexistros públicos ós que pode acceder son o da Oficina Comarcal Agraria e o do Concello, ámbolos dous rematan o seu horario ás 14:00, so lle quedaron 6 horas para xustificar o investimento.
En resumo, a gandeira tivo 6 horas para xustificar unha axuda que como mínimo debera dispoñer de 10 días hábiles (de luns a venres descontando os festivos).
Dende Beealia, asesoría en materia de métodos de prevención, amosan o seu compromiso cos gandeiros a traballar para que non se perdan estas axudas, aínda que atopen con casos ben complicados. Neste caso, ademais contaron coa colaboración da ferretería Casa Quiroga que dispón de stock de pastores eléctricos fabricados en Galicia e mallas electrificadas, o que axudou na rápida resposta que lle puideron dar á gandeira.
Beealia, como membros de O-Xan, segue a traballar, ademais, na comunicación coa Consellería de Medio Ambiente para tratar de transmitir a realidade do rural ás oficinas de Santiago.