As queimas agrícolas e forestais estarán prohibidas a partir do sábado polas altas temperaturas
A Xunta de Galicia declarou que a partir deste sábado 24 de xuño será ilegal que as persoas queimen restos agrícolas e forestais. Pese a esta medida están exentas da prohibición as queimas controladas que leva a cabo o Servizo de Prevención e Defensa contra os Incendios Forestais, que son planificadas e teñen os medios de extinción adecuados. Neste momento, os permisos que xa se outorgaron quedarán suspendidos a partir deste sábado, e tampouco se emitirán máis permisos.
Esta decisión foi tomada ante a avaliación da situación meteorolóxica que se vai a dar en Galicia os vindeiros días polos grandes riscos de incendio. Ademais, debido ao Decreto 105/2006, que establece regulacións sobre a prevención de incendios forestais, a protección de asentamentos no medio rural e a regulación de aproveitamentos e repoboación forestais, prohíbense as queimas en situacións nas que as condicións meteorolóxicas poidan ser difíciles de controlar.
A Consellería de Medio Rural solicita á poboación que extreme as precaucións e denuncie calquera actividade delituosa incendiaria da que teña coñecemento. Desde este sábado e ata novo aviso, prohíbese o uso do lume para calquera actividade agrícola e forestal para particulares. A Consellería fai fincapé en que os cidadáns teñen á súa disposición o número telefónico gratuíto 085, ao que deben chamar en caso de presenciar un incendio forestal.