As precipitacións axudan a reducir o descenso dos encoros galegos
Os encoros galegos continúan oscilando debido ás choivas, ás altas temperaturas e á humidade. Mentres que unha das concas hidrográficas galegas, Miño-Sil, aumentou un pouco polas choivas; a outra, Galicia Costa, descendeu posiblemente pola escaseza de auga, pola calor e pola saturación do ambiente.
No primeiro caso, a conca Miño-Sil (administrada polo Estado) subiu un pouco a súa capacidade total un 0,2% na última semana estando actualmente no 71,8%, uns 2.176 hectómetros cúbicos (hm³). Unha subida escasa causada polas choivas dándose as precipitacións máximas en Vigo con 88,3 l/m².
Pola súa banda, o segundo caso, a conca Galicia Costa (administrada pola Xunta de Galicia), do mesmo xeito que xa contaramos a semana pasada, segue en descenso. Na última semana baixou un 0,7% estando nestes momentos nun 78,5% da súa capacidade total, o que supón uns 573 hm³. A diminución é menor que hai unha semana (foi dun 1,5%) posiblemente debido ás choivas que caeron por esa zona.
En canto á situación xeneralizada da reserva hídrica española, esta atópase ao 47,5% da súa capacidade, almacenando nos encoros 26.648 hm³. Na última semana aumentou uns 60 hm³, 0,1% máis segundo informou o Ministerio de Transición Ecolóxica e o Reto Democrático no seu informe semanal. A maioría das concas foron subindo en torno ao 0,5% desde hai unha semana sendo poucas as que se mantiveron ou baixado de capacidade. É o caso das concas do Cantábrico Oriental e das concas internas do País Vasco que continúan manténdose igual semana tras semana ao 87,7% e ao 81% respectivamente.
As concas do Cantábrico Occidental, Duero, Tinto, Odiel e Pedras, Guadalquivir, Segura, Ebro e as concas internas de Cataluña son as que subiron desde a semana pasada. As catro concas restantes son as únicas que baixaron ao redor dun 0,3% de capacidade. Como se pode apreciar, as precipitacións afectaron considerablemente a toda a península aumentando a capacidade da maioría das concas na última semana.