Ana Miranda (BNG) denuncia na Eurocámara a falta de saneamento nos ríos galegos
A eurodeputada do BNG, Ana Miranda, declara que se compromete a continuar denunciando na Eurocámara a falta de saneamento dos ríos e encoros galegos "sempre que sexa necesario" ata lograr o saneamento necesario para salvagardar o medio ambiente. Miranda, quen visitou o encoro das Conchas xunto a Sonia Vidal, deputada no Parlamento Galego, sinala que a contaminación por cianobacterias existe no encoro desde hai anos e que se está denunciando continuamente pola veciñanza e os colectivos ecoloxistas sen que a Xunta de Galicia faga nada respecto diso.
Ana Miranda indicou que "estamos diante dun novo exemplo de incompetencia do goberno galego do Partido Popular, que leva anos sen preocuparse polo saneamento das augas”. Ademais, criticou que “ao PP non lle preocupa en absoluto o medio ambiente nin a xestión adecuada dos xurros que se producen nas granxas da Baixa Limia”. Miranda expuxo que, desde o ano 2011, leva advertindo que esas augas están contaminadas de cianobacterias procedentes das granxas e dos arredores e que levan preocupando aos agricultores, ecoloxistas e ao BNG.
Destacou tamén que, en varias ocasións, denunciouse este problema no Parlamento Europeo e que, coa recente aprobación da Directiva de Emisións Industriais, a Xunta está obrigada a limpar as augas e restaurar un ecosistema vivo no que “hoxe en día non se pode beber nin bañarse ou darlle outro tipo de usos”, denuncia Miranda.
A eurodeputada do Bloque defendeu a necesidade de "conciliar" a agricultura co medio ambiente, destacando que a contaminación no encoro das Conchas é un "claro incumprimento da Directiva Marco da auga", que establece un marco legal para protexer e rexenerar a auga e garantir o seu uso sostible a longo prazo. Miranda destaca que a Xunta de Galicia non está a realizar a depuración dos encoros e ríos tal e como está requirido na directiva.
Así mesmo, Sonia Vidal, deputada do Parlamento Galego, criticou a falta de implementación do plan estratéxico da Limia, o cal, segundo explica, atópase nun estado de espera e podería ser unha solución para o problema do encoro e a comarca da Limia. Ademais, indicou que os agricultores e gandeiros expuxeron varias alternativas para solucionar o problema da Limia, as cales non se tomaron en conta.