Amigos da Terra e Amigas das árbores denuncian vertedoiros ilegais en Ourense
Amigos da Terra e Amigas das árbores veñen de presentar denuncias diante da Consellería de Medio Ambiente, Confederación Hidrográfica Miño-Sil, Policía Local de Ourense e Policía Autonómica por uns vertedoiros incontrolados de lixo e refugallos de restos de obra no denominado "Parque da Desidia", localizado no casco urbano da cidade de Ourense e nas proximidades do complexo hospitalario. As entidades advirten que na zona hai todo tipo de residuos, ocupando máis de 500 metros cadrados da mesma, que son “altamente contaminantes tanto dos solos como das augas, coa conseguinte contaminación polos lixiviados que poidan estar afectando tamén ao Regueiro Fozado que pasa polos arredores da zona”.
A asociación lembra que todos estes residuos teñen que ser xestionados de forma axeitada, e “nunca poden ser botados en espazos abertos sen o tratamento preciso por empresa autorizada como xestora de residuos”. Ademais, hai un problema engadido, xa que o devandito vertedoiro atópase próximo ao complexo hospitalario da cidade e deben evitarse os efectos negativos para a saúde pública e o medio ambiente. Dende Amigos da Terra declaran que o Parque da Desidia “xa se aventuraba para acoller estes vertedoiros, e o concello de Ourense amosa unha vez mais a súa irresponsabilidade pola falta de vixilancia, desleixo, pasividade e desidia ao permitir ditos vertedoiros”.
A Lei 6/2021 do 17 de febreiro de Residuos de Galicia, recolle que as entidades locais terán competencias para a xestión dos residuos urbanos correspondentes ao seu municipio. Así, “as entidades locais teñen un papel importante fronte á xeración e permanencia de vertedoiros ilegais, a vixilancia de sitios con potencial de converterse en vertedoiros clandestinos ou microvertedoiros e a denuncia de verteduras ilegais”. Polo tanto, dende Amigos da Terra e Amigas das árbores “demandamos ás autoridades competentes que se identifique e sancione ós responsables das verteduras e que os devanditos vertedoiros sexan retirados, devolvendo ao seu estado orixinal a zona contaminada”.