ALTRI-GREENFIBER, UN PROBLEMA PARA O DESENVOLVEMENTO DO INTERIOR DE GALICIA
A asociación Galicia Ambiental ven de amosar o seu desacordo co macroproxecto presentado pola empresa lusa Altri (e o seu socio local Greenalia) coñecido como Greenfiber, para a creación dunha fábrica de celulosa en Palas de Rei, que tería no eucalipto a súa materia prima e no consumo de auga os principais argumentos para negar a sustentabilidade do mesmo. Como asociación ambientalista, que integra profesionais de distintas disciplinas que prestan os seus servizos no eido ambiental, preocúpannos os efectos sobre a biodiversidade que a implantación desta fábrica poderá ter no medio, na vida dos cidadáns e na fauna e flora dos arredores da contorna. Máis tendo en conta que a empresa "se enmenda repetidamente a si mesma”, con cambios de argumentario que son incomprensibles ao negar, rectificar ou alterar datos do proxecto de forma continuada e sen respaldo técnico algún. O último ao afirmar que “milagrosamente” desde esta semana consideran que van consumir a metade de auga que solicitan detraer ao río Ulla.
O obxectivo do proxecto promovido por Greenfiber é establecer unha fábrica de celulosa de gran tamaño en Palas de Rei, no centro de Galicia, cun impacto significativo na contorna física e nas producións agrarias e nas actividades económicas da zona centro de Galicia e con afección a outros territorios como a Ría de Arousa e o sistema fluvial Ulla-Deza. Isto terá un grave impacto na estabilidade e continuidade das actividades productivas agrarias actuais e sobre outras actividades que producen riqueza e fixación de poboación como a Camiño de Santiago.
Canto ao eucalipto precisado para a fabricación de celulosa, Greenfiber calculou que a planta consumirá uns 1,2 millóns de metros cúbicos de eucalipto ao ano e, cando estea a pleno rendemento, podería chegar aos 2,4 millóns. Debido á gran cantidade requirida, desde o punto de vista ambiental, preocupa que a crecente demanda vai xerar un aumento na superficie de plantación do eucalipto a través de novas plantacións, moitas delas ilegais "consentidas" (como de feito se están a producir).
A zona afectada polo asentamento da fábrica considérase de gran valor ambiental pola súa proximidade da Zona de Especial Conservación da Serra do Careón, terreos da Rede Natura 2000, os cales se esperaba que se puidesen ampliar. Esta contorna sufriría graves efectos moi prexudiciais, incluída a fauna, flora, biodiversidade, pastos, ríos, árbores autóctonas, paisaxe, bens culturais e patrimoniais.
Así mesmo, o río Ulla e a súa desembocadura na Ría de Arousa tamén se vería afectada polo uso hidrográfico e a reversión da auga usada para a creación da celulosa, xa que esta sairía en condicións de degradación a un Encoro de Portodemouros que presenta xa un alto grado de eutrofización de augas en verán, como consecuencia de vertidos e o baixo caudal de auga en verán. A compañía declarou que necesitarán 46 millóns de litros de auga ao día para converter a madeira de eucalipto en pasta de celulosa, dos cales 30 millóns de litros retornarían en forma de augas residuais “tratadas”, volume que retornaría ao encoro na súa cabeceira nun área que acostuma a quedar sen auga no estío. Situación que se vai agravar polo cambio climático e as secas cada vez máis frecuentes. Tamén descoñécense os químicos que vanse utilizar e os sistemas de tratamento e depuración propostos, o que dificulta unha avaliación ambiental axeitada dos posibles impactos ambientais ao longo do río e na desembocadura.
Ademais de todos estes efectos ambientais, hai que ter en conta os efectos na atmosfera e a súa contaminación por gases como óxido de nitróxeno ou xofre que serán desprendidos pola gran cheminea de 75 metros que se vai instalar. A carón das parcelas onde se situará a fábrica, pasa o Camiño de Santiago, polo que afectaría á gran cantidade de xente que pasa por aí cada día, así como tamén a poboación máis próxima, a maioría que vive de actividades agrarias ou turísticas relacionados coa Ruta Xacobea ao ses paso por Palas e Melide.
Por todo isto, a Asociación Galicia Ambiental móstrase en contra da posta en marcha deste proxecto, e nomeadamente contraria a que o Goberno de España tramite para os promotores axudas á sustentabilidade con fondos europeos, por incumprir os criterios de sustentabilidade precisos. Por esta razón respalda a convocatoria da manifestación para mañá domingo 26 de maio.