AEMS-Ríos con Vida entrega os seus Premios anuais o próximo 17 de xuño, no marco da celebración das XLIII Xornadas que celebra na cidade de Lugo
A organización AEMS-Ríos con Vida entrega os seus Premios anuais durante as XLIII Xornadas o 17 de xuño na cidade de Lugo. Este ano os premiados son PLADEVER, a Plataforma pola defensa do río Verdugo, e a empresa mineira ERIMSA, que recibirán os premios RÍOS VIVOS e RÍOS MORTOS 2023 respectivamente. O primeiro pola súa incansable loita pola restauración do río Verdugo, e o segundo pola súa responsabilidade na vertedura de residuos moi prexudiciais en ríos galegos. Ademais dos premios, os invitados poderán gozar dunha fin de semana chea de actividades en Lugo capital durante os días 16, 17 e 18 de xuño con motivo das XLIII Xornadas anuais de AEMS-Ríos con Vida no Hotel Torre de Núñez, onde tamén se realizará o acto de entrega de premios.
Como cada ano, a organización decana na defensa dos ríos e a pesca recreativa sostible, AEMS-Ríos con Vida, celebra unha entrega de premios nos que se premia ás boas accións e ás malas no referente á preservación e o coidado dos ríos. De tal forma que agradece o bo traballo dunha empresa e, ao mesmo tempo, mostra o destrutor traballo doutra, facendo así ver as dúas caras dunha moeda.
Este ano, o Premio RÍOS VIVOS 2023 concédeselle á Plataforma pola defensa do río Verdugo, PLADEVER, xa que loitou de forma insistente pola restauración do río Verdugo, en Pontevedra, e especialmente pola súa reivindicación do desmantelamento da presa de Ponte Inferno tras máis de 130 anos de explotación. Esta plataforma, establecida en Ponte Caldelas, está constituída por unha serie de colectivos veciñais e ecoloxistas, como é o caso da Rente do Chan. Nos últimos anos, PLADEVER fixo grandes contribucións á defensa do río Verdugo empezando pola sensibilización e unión dos cidadáns para preservar o seu río e continuando pola denuncia da insostenibilidad do transvasamento a Pontevedra, o incumprimento dos caudais ecolóxicos en Ponte Inferno e a contaminación do río. Ademais foi recoñecida internacionalmente polo seu labor na resolución da demolición da presa de Ponte Inferno por parte de Augas de Galicia o pasado xuño de 2022. Este acto axuda considerablemente á conservación de especies emblemáticas da conca do Verdugo como son o salmón atlántico e a anguía.
Doutra banda, o Premio RÍOS MORTOS 2023 será entregado á empresa mineira ERIMSA por ser responsable da vertedura en ríos de Galicia de residuos procedentes de explotacións ao descuberto. O último caso recolleito deste tipo de accións provocou unha rotura dunha balsa mineira en Frades, A Coruña, que afectou os ríos Tambre, Gaiteiro e Maruzo. Segundo a propaganda da empresa, esta desenvolve unha minería “moderna e sostible, que preserva o medio ambiente” e que é “compatible con actividades económicas propias de contornas rurais, como a agricultura, a gandería o turismo e o aproveitamento forestal”. Pero estas afirmacións son diferentes á realidade nas súas minas e canteiras ao descuberto. A extracción, procesado e/o lavado de distintos minerais vén causando graves impactos por sedimentación e mesmo por verteduras tóxicas en distintos ríos do noroeste ibérico, non só en Galicia senón tamén noutras zonas contiguas, como a conca do río Cabrera, en León, sometida a unha recorrente contaminación pola industria louseira. A pesar do habitual greenwashing, preñado de grandes palabras como Sustentabilidade, Responsabilidade Social e Economía Circular, os numerosos ríos afectados por estas industrias no noso país raramente perden a cor branca, marrón ou gris debido á vertedura continuada de sólidos desde minas, canteiras e vertedoiros, que cegan o leito e afogan ou envelenan a vida fluvial.