ADEGA presenta tres novos desafíos para frear parques eólicos na Coruña e Pontevedra
A Asociación para a Defensa Ecolóxica de Galicia (ADEGA) continua a campaña “Ti podes paralos!” coa que tiña conseguido anular o parque eólico de Campelo e a paralización dos parques de Bustelo e Monte Toural. Agora lanza os desafíos para Vilartoxo, Monte Festeiros e Troitomil. Trátase dos parques eólicos Vilartoxo, que se atopa en Baña e Val do Dubra; Monte Festeiros, nos concellos de Forcarei e Silleda; e Troitomil, en Baña e Negreira.
Os parques de Troitomil e Vilartoxo forman parte do que será un macropolígono eólico no que, segundo informa ADEGA, tamén se atopa o parque Barrosino que foi «derivado dunha fragmentación artificiosa artellada coa finalidade de sortear unha adecuada e rigorosa avaliación ambiental dos impactos en conxunto». Estes proxectos, promocionados pola empresa Green Capital Power S.L., son un gran perigo para os espazos naturais e culturais da zona na que están previstos de instalarse, concretamente nos concellos de Baña, Val do Dubra e Negreira que pertencen ás comarcas de Santiago de Compostela e Barcala. Entre os dous suman máis de 57MW de potencia eólica e constan de 11 aeroxeradores que chegan aos 220 metros de altura.
As zonas onde pretenden asentar estes parques eólicos sitúanse en varios mananciais de auga das cales se abastecen as fontes de auga que proporcionan auga ás aldeas da zona, o cal non foi se avaliado nos estudos de impacto ambiental sendo este recurso uno dos que máis perigo ten, razón pola cal os veciños están gravemente consternados. A área máis afectada por esta situación é a do parque de Troitomil xa que pasa unha turbeira que é hábitat natural de interese prioritario para a Unión Europea.
Así mesmo, o parque Vilartoxo creará tamén un grave impacto sobre a flora e a fauna en perigo de extinción, sobre dúas especies protexidas de morcegos e sobre o lobo. E non só iso, senón que tamén varias mamoas veríanse afectadas xa que quedarían dentro do polígono eólico. Ambos os proxectos son un perigo para as explotacións agropecuarias que se sitúan a poucos metros das instalacións así como de casas e propiedades dos veciños que quedarían dentro da superficie do parque. Isto implicaría unha depreciación dun valor próximo ao 40%.
O terceiro dos desafíos “Ti Podes Paralos!”, o que constitúe o parque eólico de Monte Festeiros é outro gran perigo para a zona comprendida entre os concellos de Forcarei e Silleda. Este parque estableceríase nunha área de máis de 1.500 hectáreas e sumaría un total de 10 aeroxeradores. Esta área constitúe un corredor ecolóxico entre a Serra do Candán e as Brañas de Xestoso, integradas na Rede Natura 2000, onde se atopa a mellor representación de turbeiras acedas de toda Galicia, na Lagoa Sacra de Olives, tamén se poden atopar vexetais e animais como é a tararaña cincenta, o sisón, a droseira ou a herba de algodón. Ademais, coa creación deste parque, tamén se atopa en perigo o patrimonio cultural que sostén a memoria do Coto do Mosteiro de Aciveiro.
A campaña co hastag #TiPodesParalos está dirixida recadar o diñeiro necesario para poder emprender as accións xurídicas suficientes para defender o medio ambiente e o rural galego fronte á actual invasión eólica nos tribunais. Todos os desafíos activos desta campaña pódense consultar na páxina web oficial https://tipodesparalos.helpbys... na que se ofrece a posibilidade de destinar doazóns tanto a un proxecto en concreto como a un fondo común non adscrito a ningún proxecto eólico en particular, o cal servirá de apoio ao conxunto dos desafíos impulsados pola asociación.
Para os desafíos de Vilartoxo e Troitomil espérase poder chegar a recadar 6.500€, dos cales a súa recadación constaría de dúas fases. A primeira terá unha duración de 1 mes empezando o 31 de maio e acabando o 2 de xullo, na que ADEGA espera chegar como mínimo aos 3.000€ para cada un dos proxectos. Isto avalaría a representación da asociación no pertinente recurso administrativo de alzada, a elaboración dun informe técnico ambiental e cubrir outros posibles gastos de xestión. Para a segunda fase, ADEGA espera poder conseguir os 3.500€ restantes para a interposición do recurso contencioso-administrativo no Tribunal Superior de Xustiza de Galicia e para a solicitude de paralización cautelar. Pola súa banda, para o desafío do Monte Festeiros o obxectivo é chegar a recadar uns 7.300€ tamén en dúas fases, nas que cada unha consta do obxectivo de 3.650€.
Para máis información pode contactar cos seguintes teléfonos: 698139913, 981570099.