A Xunta valora a colaboración dos concellos na loita contra incendios pola xestión de biomasa e o mantemento que están a realizar
José González, conselleiro de Medio Rural, visitou o pasado mércores 16 de agosto o concello de Ribadavia para supervisar a xestión de biomasa e o mantemento das infraestruturas que se están realizando para a prevención contra os incendios. A Xunta de Galicia, a Federación Galega de Municipios e Provincias (Fegamp) e a empresa pública Seaga acordaron un convenio para salvagardar as aldeas. O obxectivo deste acordo foi establecer un sistema público de xestión de biomasa para previr e protexer de incendios forestais.
A este convenio están adheridos 282 concellos e contan cun orzamento de 12 millóns de euros destinados tanto á xestión da biomasa como a outras actuacións que teñen como obxectivo a protección das aldeas galegas contra os incendios. De entre esas actividades destacan a elaboración de instrumentos de planificación, a revisión do cumprimento de obrígalas de xestión da biomasa, así como tamén iniciativas de mobilización de terras como as aldeas modelo.
É por iso polo que, coa axuda deste convenio, 53 concellos de Galicia puideron contar con maquinaria específica para poder realizar estes traballos. No que respecta á xestión da biomasa mediante maquinaria, é importante mencionar os acordos establecidos con 13 concellos da provincia de Ourense, en colaboración coa Deputación, para a adquisición de tractores capaces de levar a cabo estas tarefas preventivas. Como explicou o conselleiro, «hai competencias de todas as administracións, pero a Xunta de Galicia entende necesario apoiar aos concellos, sobre todo os pequenos, no cumprimento das súas obrigacións como poden ser a elaboración dos plans de prevención municipais como poden ser tamén comprobar como están as franxas ao redor das aldeas».
As medidas enmárcanse no Plan de prevención de incendios da Xunta, o cal se enmarca no Plan de Prevención e Defensa contra os Incendios Forestais de Galicia (Pladiga). Ata o ano que vén, a planificación preventiva ten como obxectivo intervir aproximadamente 60.000 hectáreas de terra, 5.600 quilómetros de camiños forestais e case 4.840 puntos de auga. Un orzamento de case 38,8 millóns de euros está destinado a estas accións, o que representa un aumento de máis do 17% en comparación co ano anterior.
Durante a visita a Ribadavia, o conselleiro de Medio Rural estivo acompañado polo alcalde desta localidade, César Fernández, para ver como van os traballos de roza da zona. Como el mesmo explicou, esta visita débese a «unha colaboración institucional entre a Xunta de Galicia e os concellos». Do mesmo xeito, mostrou o seu asombro ante as declaracións do alcalde de Pontevedra que dixo que os incendios forestais son “competencia exclusiva” da Xunta de Galicia, algo que o conselleiro intentou sentenciar dicindo que é unha cuestión que «hai que traballar entre todas as administracións».
Na visita aproveitou para revisar o funcionamento do tractor “cedido” pola Xunta ao concello de Ribadavia para a realización de rozas no marco do convenio mencionado anteriormente. Comentaba tamén que «están a traballar preto de 40 tractores no conxunto de Galicia», xa que «a loita contra os incendios forestais é un traballo de cooperación entre administración e tamén dos propios cidadáns, dos que teño que dicir que están moi responsabilizados no que se refire á limpeza das leiras arredores das franxas que temos tamén ao redor das aldeas». En canto á campaña de incendios, o conselleiro quixo pedir cautela a pesar dos labores de prevención que se están realizando.