A Xunta elimina 33 hectáreas de acacias para a creación do polígono agroforestal de Barzamedelle
Co obxectivo de “impulsar” o polígono de Barzamedelle, en Leiro (Ourense), a Xunta de Galicia eliminou parte das acacias que imposibilitaban a súa posta en marcha. Polo momento, elimináronse 33 hectáreas das 59,2 que se estima que ocupa esta especie invasora no perímetro do polígono. Debido a que esta especie é pirofítica, presenta un risco para a prevención do lume, polo que esta medida foi ademais crucial para reforzar a protección da rexión do Ribeiro contra os incendios forestais.
O polígono de Barzamedelle situado no municipio de Leiro, Ourense, ocupará unha superficie de 145,6 hectáreas, das cales preto de 60 estaban a ser ocupadas pola especie invasora acacia. Debido á necesidade de limpar os terreos para a construción do polígono e ao perigo que supón esta especie para a biodiversidade que a rodea, esta está a ser eliminada. Polo momento eliminouse xa 33 hectáreas, case un 56% do total.
O conselleiro de Medio Rural, José González, a directora xeral da Axencia Galega de Desenvolvemento Rural, Inés Santé, e o tenente de alcalde de Leiro, Ramón Álvarez, supervisaron o pasado venres 22 de setembro os traballos realizados para a construción do polígono agroforestal. O conselleiro puxo en valoros traballos de roza das acacias e subliñou ademais esta actuación "pioneira no seu enfoque e dimensións", así como tamén destacou a importancia destes traballos que, como explicou, son "precisos" para o recoñecemento das parcelas existentes e da investigación dos seus titulares.
O Medio Rural informou ademais que levou a cabo a limpeza e recuperación de case seis quilómetros e medio de camiños para mellorar as comunicacións nun polígono que se enmarca na implementación da Lei de recuperación da terra agraria de Galicia e que implicará a mobilización de 145,6 hectáreas en total. Actualmente, identificáronse 113 donos de 183 parcelas, o que equivale ao 43% das 145,6 hectáreas do polígono, grazas á investigación da propiedade.
O obxectivo, segundo o conselleiro, é revitalizar terras produtivas de alta capacidade que foron abandonadas ou infrautilizadas de maneira sostible. Afirmou que queren "fomentar" a actividade agropecuaria, establecer unha poboación estable e previr os incendios forestais. González informou que o polígono se enfocará no viñedo (cultivos leñosos) debido á súa localización estratéxica, o que permitirá incrementar a produción da denominación de orixe Ribeiro.
O conselleiro explicou que o propósito deste labor é "impulsar a economía do territorio" e facer posible "vivir no e do rural". Ademais, búscase previr incendios e reducir os seus efectos.