A Xunta amplía os efectivos antiincendios engadindo 30 patrullas do exército para reforzar a vixilancia e a identificación previa dos incendios
O pasado venres 28 de xullo o Conselleiro de Medio Rural, José González, xunto co director xeral de Defensa do Monte, Manuel Rodríguez, e o presidente da Deputación de Pontevedra, Luís López, presentaban os novos equipos para a loita contra os incendios no marco dun convenio entre o Goberno galego e o Ministerio de Defensa. Estes efectivos constan dunhas trinta patrullas do Exército e dous equipos de mantemento móbil que se unirán aos corpos antiincendios da Xunta. Estas tropas integraranse na chamada Operación Centinela Gallego e se encargaran de reforzar a vixilancia, a disuasión e a identificación dos potenciais axentes dos lumes forestais.
Segundo informou o Conselleiro José González, para este operativo, renovado un ano máis, engadíronse 30 patrullas terrestres e 2 equipos de mantemento móbil que se despregarán polos montes galegos. O propósito é que a presenza de medios militares axude a previr incendios e actividades incendiarias, ao aumentar a cantidade de tropas no territorio e, do mesmo xeito, a vixilancia e a disuasión. Xunto con estes corpos de Exército, contarase tamén coa Unidade de Investigación de Incendios Forestais (UIFO), creada no ano 2021 co fin de aclarar as causas dos incendios. Espérase que estes efectivos das Forzas Armadas melloren a seguridade das persoas, dos bens e que, á súa vez, “protexan e defendan” os bosques fronte ás graves ameazas de incendio que poida haber.
Así mesmo, anunciouse tamén que estes novos dispositivos contarán cunha serie de drons que serán despregados polo territorio con cámaras de última xeración como rede de vixilancia fixa. Estes estarán provistos dunha tecnoloxía especialmente deseñada para exteriores e vixilancia forestal que é capaz de identificar ata as matriculas de vehículos nas pistas dos montes.
Finalmente, durante a presentación, ademais de agradecer o labor que realizan a todos os efectivos contra os incendios, o Conselleiro apelou á poboación “á prudencia e á colaboración cidadá”. Do mesmo xeito, quixo lembrar a existencia do número gratuíto 085 para que a xente chame en caso de detectar un incendio forestal, así como tamén a dispoñibilidade do teléfono gratuíto e anónimo 900 81 50 85 para denunciar calquera actividade incendiaria delituosa da que se teña sospeita ou coñecemento.