A reserva hídrica galega continúa por encima do 65% da súa capacidade total
Como xa viñamos contando na última actualización sobre a conca hidrográfica galega, esta está a baixar paulatinamente debido ás altas temperaturas. Nas últimas tres semanas a baixada foi pequena, de pouco menos dun 3%, en parte polas precipitacións que houbo nas últimas semanas. Isto fixo que a baixada fora menor que o pasado mes de xullo. Por agora, ambas concas atópanse por encima do 65% da súa capacidade total.
De momento, a conca Galicia Costa, a cal está administrada pola Xunta de Galicia, atópase ao 66,5% cun total de 455 hectómetros cúbicos (hm³). En comparación cos datos de fai tres semanas, diminuíu un 2,8%, moito menos do que o facía en xullo en comparación cos datos de maio, que superaba o 9% de baixada.
Pola súa banda, a conca Miño-Sil, administrada polo Estado, está ao 66,6% da súa capacidade total, uns 2.018 hm³. A baixada desta conca é menor, tan só dun 2%, pouco menos que na última actualización que publicamos que era de pouco máis dun 3%. Como se pode observar, ambas as concas están máis ou menos no mesmo porcentaxe de capacidade, só tendo unha diferenza dun 0,1% máis na conca Miño-Sil.
Sobre a situación estatal, segundo os informes do Ministerio de Transición Ecolóxica e o Reto Demográfico, a reserva hídrica española atópase ao 41,1% da súa capacidade total, acumulando os encoros 23.053 hm³ de auga. O MITECO informou que na última semana diminuíu en 584 hm³, un 1% da súa capacidade total dos encoros.
Se comparamos estas cifras coas de fai tres semanas a baixada é dun 3,6%. Polas altas temperaturas esta baixada debería ser maior, pero debido ás precipitacións, púidose reducir. Ditas precipitacións afectaron considerablemente á vertente Atlántica pero foron escasas na vertente mediterránea. A máxima produciuse en San Sebastián - Donostia con 42,7 mm (42,7 l/m²).
En xeral, tódalas concas minguaron pero, a pesar diso, algunhas como a do Cantábrico Oriental e Occidental, as concas internas do País Vasco e as de Tinto, Odiel e Piedras mantéñense por encima do 65% da súa capacidade total. Mentres tanto, as máis preocupantes son as concas de Guadiana, Guadalete-Barbate, Guadalquivir, conca Mediterránea Andaluza, Segura, e concas internas de Cataluña, que están por baixo do 30%.