A invasión da herba da Pampa medra sen freo na autoestrada AG-55
Tal e como advertira a Asociación Galicia Ambiental o pasado ano, o treito da autoestrada AG-55 entre A Coruña e Carballo atópase nun momento crítico pola expansión da especie invasora herba da Pampa (Cortaderia Selloana). A dispersión masiva da súa semente leva provocando un crecemento exponencial nos últimos anos, favorecido en gran medida pola ausencia de medidas preventivas por parte das administracións.
Se no pasado ano a presenza desta planta se limitaba a varios núcleos localizados na estrada costeira entre Carballo e Fisterra (que poderían terse controlado con actuacións a tempo), nos últimos meses a súa propagación estendeuse xa por toda a autoestrada, xerando graves problemas tanto ambientais como de saúde pública.
A herba da Pampa (Cortaderia selloana) é unha das especies exóticas invasoras que máis avanzou en Galicia, grazas á súa alta capacidade de dispersión e á falta de estratexias de control eficaces. A súa proliferación intensificouse en paralelo á construción de grandes infraestruturas como polígonos industriais, novas autovías ou a rede ferroviaria de alta velocidade. Neste contexto, a falta de cumprimento das obrigas preventivas por parte da concesionaria da AG-55 (derivadas da inclusión da especie no Catálogo Español de Especies Invasoras) converteuse nun dos principais factores de expansión, especialmente a través das vías de comunicación.
Esta realidade está a agravar a situación na Costa da Morte, onde a invasión da Cortaderia causa serios impactos ambientais e riscos para a saúde da poboación.
Co obxectivo de concienciar ás novas xeracións, a Asociación Galicia Ambiental visitou o pasado venres pola mañá o Centro de Promoción Rural EFA Fonteboa, en Coristanco (A Coruña). Alí, unha quincena alumnos do ciclo superior de Paisaxismo e Medio Rural participaron nunha charla informativa e sensibilizadora sobre a problemática das especies invasoras, con especial atención á herba da Pampa, no marco do proxecto europeo LIFE Coop Cortaderia que a entidade desenvolve en Galicia.