A Comisión Europea revisa as políticas de protección do lobo
O regreso do lobo ás rexións da UE nas que estivo ausente durante moito tempo "está a provocar cada vez máis conflitos coas comunidades agrícolas e de cazadores locais, especialmente cando as medidas para previr ataques ao gando non se aplican de forma xeneralizada". Así o entende a Comisión Europea e a súa presidenta, Ursula von der Leyen, declarou: «A concentración de lobos nalgunhas rexións europeas converteuse nun perigo real para o gando e, potencialmente, tamén para os seres humanos. Insto as autoridades locais e nacionais a que tomen medidas cando sexa necesario. De feito, a lexislación vixente da UE xa lles permite facelo».
A Comisión convidou hoxe as comunidades locais, aos científicos e a tódalas partes interesadas a que presenten, como moi tarde o 22 de setembro de 2023, datos actualizados sobre a poboación de lobos e os seus efectos. Para iso, poderán utilizar a seguinte dirección de correo electrónico: EC-WOLF-DATA-Collection@ec.europa.eu
A partir dos datos recolleitos, a Comisión decidirá sobre unha proposta para modificar, no seu caso, o estatuto de protección do lobo na UE e actualizar o marco xurídico a fin de introducir, en caso necesario, unha maior flexibilidade, á luz da evolución desta especie.
A revisión por parte da Comisión dos datos científicos sobre o lobo na UE "forma parte integrante da análise en profundidade que a Comisión está a levar a cabo en resposta á Resolución do Parlamento Europeo do 24 de novembro de 2022. En abril de 2023, a Comisión comezou a recompilar os datos dos grupos de expertos e das principais partes interesadas, así como os datos notificados polas autoridades nacionais conforme a lexislación da UE e internacional vixentes. Con todo, estes datos seguen sen ofrecer unha imaxe completa suficiente para que a Comisión deseñe novas medidas, polo que a Comisión está a ampliar hoxe esta consulta".
A Comisión di ser "consciente de que o regreso do lobo ás rexións da UE nas que estivo ausente durante moito tempo pode dar lugar a conflitos coas comunidades agrícolas e de cazadores locais, especialmente cando as medidas para evitar ataques ao gando non se aplican de maneira xeneralizada".
Como especie autóctona, o lobo é un elemento integral do patrimonio natural de Europa e desempeña un papel importante nos seus ecosistemas. En virtude da Directiva sobre os hábitats, a maioría das poboacións de lobos en Europa goza dunha protección estrita, con posibilidades de excepción. Lembra a Comisión que "en virtude da Directiva sobre os hábitats, os Estados membros poden, en determinadas condicións, establecer excepcións ás prohibicións do réxime de protección rigorosa, tamén co fin de protexer os intereses socioeconómicos".