Un documento de Greenpeace expresa os criterios para asegurar un desenvolvemento renovable e respetuoso
Greenpeace fixo público un documento coa súa proposta para conseguir que o desenvolvemento das enerxías renovables se faga ao ritmo necesario e coa calidade precisa para loitar contra a emerxencia climática e, ao mesmo tempo, protexer a biodiversidade e os dereitos das persoas. O documento, publicado o 15 de xuño deste ano, reflicte a formulación da ONG baixo criterios xerais, enerxéticos, sociais, económicos e ambientais para contribuír ao impulso do desenvolvemento renovable. No documento, a organización defende a “urxencia dun despregue renovable coa máxima participación social e a protección medioambiental”. Ademais, reclama unha maior sostibilidade territorial e unha redistribución xusta dos riscos e beneficios no ámbito rural.
A ONG destaca, entre outras medidas, a importancia de garantir espazos de diálogo e participación efectiva coa sociedade civil. Así, pódese incluír ao territorio e ás poboacións implicadas polos efectos do desenvolvemento renovable nos procesos de redistribución dos beneficios sociais e económicos xerados pola utilización dos seus recursos. Ademais, lembra a importancia de poñer esta transición enerxética en mans da cidadanía como unha oportunidade para construír un sistema enerxético distribuído máis xusto.
María Prado Rubio, responsable da campaña de enerxía de Greenpeace, explica que a transición enerxética debe ser entendida como unha evolución dun sistema enerxético que sempre se baseou nun modelo especulativo a outro no que a participación da sociedade civil sexa impulsada ao máximo. Tamén comenta o seguinte: “É unha oportunidade para trasladar ao territorio os beneficios dun sistema que ten que ser máis xusto enerxética e medioambientalmente, e é obriga das autoridades, da cidadanía, das institucións e dos promotores corresponsabilizarse con este desenvolvemento”. Ademais, engade que é imprescindible atopar as mellores fórmulas para acelerar a substitución dos combustibles fósiles e nucleares polas renovables e recuperar o tempo perdido con xusticia social, enerxética e climática.
Greenpeace lembra o inmenso valor social das renovables porque contribúen á mitigación do cambio climático, á redución da contaminación, á creación de emprego, á cobertura das necesidades básicas e á recuperación da actividade económica. Ademais, a electricidade xerada con renovables é a vía más eficaz para asegurar todas as demandas enerxéticas.
Principais demandas da organización ecoloxista
Aceptación e participación da sociedade: A organización considera que é deber dos Gobernos e os promotores de proxectos renovables fomentar un desenvolvemento renovable que poida ser comprendido como unha oportunidade para o medioambiente e a sociedade. Polo tanto, non só esixe unha transposición fiel e urxente das directivas europeas en materia de Autoconsumo, Comunidade Enerxética Local e capacidade flexible, senón un verdadeiro impulso dende todas as administracións e os promotores para mobilizar á participación da cidadanía. Ademais, a organización demanda que se garanta a creación de espazos de participación, diálogo e debate dende o comezo dos procesos entre promotores, autoridades e comunidades.
Planificación enerxética: A organización demanda unha planificación enerxética autonómica e local coordinada coa nacional, xa que está contida no PNIEC, que determine a enerxía necesaria en cada comunidade autónoma para conseguir un sistema eléctrico 100% renovable en 2030 e un sistema enerxético 100% renovable, eficiente e intelixente en 2040.
Maior ambición de descarbonización: A organización demanda ao Goberno central unha maior ambición climática. De feito, o pasado setembro interpuxo un litixio contra o Goberno español por inacción ante o cambio climático.
Respecto ás medidas ambientais, Greenpeace destaca estas demandas:
Priorizar emprazamentos sobre solos degradados, pois un 4,9% da superficie do solo empregada en España está dedicada a usos de alto impacto.
Excluír todos os Espazos Naturais Protexidos, as áreas críticas de especies en perigo de extinción e a Rede Natura 2000.
O cumprimento en todo o Estado como directriz executiva da zonificación do territorio nacional presentada polo MITERD que determina a sensibilidade ambiental do territorio.
Evaluación ambiental estratéxica sinérxica e non individual, que non permita a fragmentación de proxectos para diminuír artificialmente o tamaño e burlar a legalidade ambiental.