Prohibidas as queimas agrícolas e forestais
A Xunta de Galicia prohibe desde hoxe as queimas de restos agrícolas e forestais realizadas por particulares en Galicia ata nova orde debida á situación meteorolóxica. A Xunta non emitirá permisos adicionais e os que xa foron outorgados quedarán suspendidos a partir de hoxe, xoves 30 de maio. Sen embargo, as queimas controladas levadas a cabo polo Servizo de prevención e defensa contra os incendios forestais, previamente planificadas e cos medios adecuados de extinción, están exentas desta prohibición.
“A decisión tomouse tras avaliar a evolución da situación meteorolóxica e unha vez analizados polo miúdo os diferentes indicadores técnicos que inciden no risco de lume”, explicaron nun comunicado. Esta prohibición está estipulada no Decreto 105/2006, que establece regulacións sobre a prevención de incendios forestais, a protección de asentamentos no medio rural e a regulación de aproveitamentos e repoboación forestais. No decreto se sinala que as queimas deben prohibirse “cando as condicións meteorolóxicas poidan dificultar o seu control”.
A Consellería do Medio Rural solicita á poboación que “extreme as precaucións e denuncie calquera actividade delituosa incendiaria da que teña coñecemento”. Desde este xoves e ata novo aviso, prohíbese o uso do lume para ningunha actividade agrícola e forestal para particulares. A Consellería fai fincapé en que os cidadáns teñen á súa disposición o número telefónico gratuíto 085, ao que deben chamar en caso de presenciar un incendio forestal.