Galicia recibirá máis de 11 millóns de euros por parte do MITECO para actuacións en biodiversidade e restauración ambiental
Galicia recibirá 11.141.357 euros de axudas por parte do Ministerio para a Transición Ecolóxica e o Reto Demográfico (MITECO) no marco do Plan de Recuperación, Transformación e Resiliencia (PRTR) para desenvolver actuacións en biodiversidade e restauración ambiental. Isto supón que o territorio galego recibirá un 4,9% do importe total das axudas, que suman un total de 226,75 millóns de euros para todo o territorio español. Cada comunidade autónoma, segundo os criterios de reparto refrendado, recibirá un incentivo diferente. Así, Galicia sitúase como a oitava comunidade que recibirá máis fondos, por debaixo de Castela e León, Andalucía, Castela a Mancha, Extremadura, Aragón, Cataluña e a Comunidade Valenciana.
O acordo, adoptado a petición do MITECO e ratificado pola Conferencia Sectorial de Medio Ambiente, supón facer entrega ás CCAA do segundo paquete de fondos asignado na reunión deste órgano celebrada o pasado 9 de xullo. O primeiro reparto foi de 235,25 millóns de euros, que sumados á presente asignación de fondos completa un total de 462 milóns de euros. Este importe destinarase a inversións de protección e conservación da biodiversidade tanto mariña como terrestre, a restauración de ecosistemas e o desenvolvemento dunha xestión forestal sostible. O conxunto de medidas comprendidas no acordo pretende xerar un impacto rexenerador positivo nas áreas rurais e contrubuír aos desafíos demográficos e de cohesión territoriais. Ademais, reportará vantaxes de cara á creación de emprego e fortalecemento das pemes.
Entre as distintas liñas de actuación á que as comunidades destinarán estes fondos sobresaen pola súa contía os capítulos de inversións en restauracións de ecosistemas, cun 23% do global; a elaboración de plans e instrumentos de xestión forestal sostibe (o 17%); e a mellora da biodiversidade terrestre, cun 13%. Nos citados ámbitos destacan as intervencións en conservación de especies e hábitats, recuperación de poboacións de especies de fauna e flora, erradicación de especies exóticas invasoras, etc.
Ademais, financiarase a renovación e mellora das instalacións asociadas á xestión do patrimonio natural e particular en espazos protexidos, as políticas de sensibilización e difusión da importancia da conservación da biodiversidade para a saúde e o benestar do ser humano. A territorialización de fondos do compoñente 4 do PRTR incide especialmente na restauración de ecosistemas, nos seus compoñentes ecolóxicos, hidrolóxicos, mellora do carbono orgánico en solos e accións contra a desertificación. Por outra banda, contarán cunha dotación relevante as intervencións de soporte técnico aos propietarios, xestores e administracións responsables de masas forestais. Tamén haberá actuacións de adaptación á problemática dos incendios forestais, como renovación de medios terrestres e adquisición de medios de prevención.