ADEGA insiste que Nostián non precisa un quinto contedor
A asociación ecoloxista ADEGA reitera que a planta de residuos de Nostián non necesitaba crear un quinto contedor para separar os residuos plásticos. Para explicar o porqué, ADEGA presentou un informe cos datos reais para mostrar a situación desa planta en comparación coa de SOGAMA. ADEGA, tras revisar os datos, chegou á conclusión de que os datos de Nostián, en comparación con SOGAMA, son mellores do esperado polo que non ven necesario a implantación do quinto contedor como fixo no seu momento SOGAMA.
Segundo os datos do informe, os residuos xerados de Nostián entran no obxectivo legal cunha porcentaxe de recuperación do 58,4%, o que supón un 31,9 kg de residuos de envases por habitante e ano en 2022. En comparación, SOGAMA está moi por detrás xa que só chegou ao 15,4%, moi por baixo do obxectivo, recuperando tan só 8,3 kg. Tras ver estas cifras pódese apreciar que a creación dun quinto contedor específico para refugallos de envases, que se lle está solicitando a Nostián non contribuirá a aumentar as cantidades recuperadas.
Actualmente, SOGAMA dispón dun quinto contedor que, segundo eles anunciaron cando o puxeron, é para unha “mellor recollida”, pero os datos indican que o que realmente están a facer é destinar máis do 80% dos residuos recolleitos polos concellos é queimalos ou verterlos. Isto supón que Galicia este de segunda pola cola, a última é Melilla, na reciclaxe en ámbito estatal, segundo datos do Ministerio. Isto indica que SOGAMA non está a facer as cousas tan ben como di.
Galicia é a terceira Comunidade Autónoma (C.A.) con maior porcentaxe de incineración un 46,2% dos residuos, só despois de Melilla e Cantabria, e moi por encima da media do Estado, que rexistrou un 10,1% de incineración en 2020. A media estatal de recollida separada foi do 17,3% e a de Galicia do 13,7%, situándose en undécimo lugar entre as C.A., novena pola cola. Os resultados mostran o papel diverso que desempeñan a cidadanía e as plantas de tratamento, os cales están influenciados pola dimensión de SOGAMA. En canto á recolección separada, realizada polos e as cidadáns, ocupamos o posto 11 entre as CA, mentres que en reciclaxe total, cando se suma o traballo realizado nas plantas, atopámonos no posto 18 (segundos pola cola).
Mentres tanto, os datos de 2022 da planta de Nostián indican unha reciclaxe do 20,3%, biodigestión e compostaxe do 30,6% e vertedura do 49,1%. Uns datos que só foron superados en 2019 cando as verteduras baixaron do 50% a un 48%. A pesar diso, aínda estase debatendo se Nostián debe seguir o modelo impartido por SOGAMA. Na actualidade, Nostián alcanza os obxectivos de recollida e preparación para a reciclaxe dos refugallos de envases, que oscilan entre o 55 e o 60% das cantidades producidas.
Os resultados demostran que a implementación dun contedor específico para colleitar refugallos de envases de maneira separada do resto da fracción seca non mellorará a situación actual de Nostián, senón que o contrario. ADEGA explica que a mellora debe provir de medidas alternativas como a conciencia pública e a recolección selectiva en orixe, co fin de asegurar o tratamento independente en Nostián da fracción orgánica xa separada en orixe. E engade, "Se queremos ir máis aló, debemos pensar en modelos de recollida máis eficientes, como pode ser o modelo pórtao a porta para os residuos domiciliarios en substitución dos contedores anónimos de rúa".