A Xunta anuncia a resolución de subvencións para promover proxectos de reutilización de residuos municipais
O Diario Oficial de Galicia publicou a resolución das subvencións dedicadas a apoiar novos proxectos empresariais ou sen ánimo de lucro, co obxectivo de promover a preparación para a reutilización (PxR) de residuos municipais e mellorar as instalacións de tratamento xa existentes. Para iso contouse cun orzamento de preto de 2 millóns de euros que irán parar a empresas, autónomos, asociacións e fundacións.
Ditas subvencións foron outorgadas pola Vicepresidencia Segunda e Consellería de Medio Ambiente, Territorio e Vivenda en virtude da orde convocada en agosto para fomentar accións na Comunidade en relación aos residuos de competencia municipal.
As subvencións contan con catro liñas de financiamento distintas dedicadas a proxectos de nova construción, ampliación ou mellora de instalacións de preparación para a reutilización (unha para asociacións e fundacións e outra para empresas e autónomos). Así como tamén a actuacións en plantas de triaxe e clasificación de envases lixeiros ou melloras en centros de tratamento existentes para incrementar a eficacia na recuperación dos materiais contidos no lixo que reciben.
As iniciativas finalmente financiadas teñen como obxectivo mellorar a xestión e recollida en orixe da fracción orgánica dos residuos municipais, a recolección e xestión de fraccións de refugallos especiais de orixe doméstica, e o desenvolvemento da infraestrutura necesaria para tratar os residuos xerados e cumprir cos obxectivos establecidos, explica a Xunta nun comunicado.
Segundo informou a Xunta, os proxectos subvencionados foron catro, dous dos cales correspondían aos obxectivos da Liña 2, que estaba dirixida a autónomos e empresas para instalacións de PxR, e os outros dous ás iniciativas da Liña 3, dirixida a autónomos e empresas para melloras nas instalacións de triaxe e clasificación de envases.
Estas subvencións, cofinanciadas con fondos europeos do programa NextGenerationEU, “permiten cumprir cos obxectivos establecidos pola normativa actual en relación aos residuos municipais”, declara a Xunta. Os proxectos financiados responden á nova cultura empresarial circular na que o goberno galego pretende apostar por unha tecnoloxía ecoeficiente, que poderá axudar á preparación para a reutilización dos residuos de orixe municipal e á redución dos refugallos destinados a vertedoiro.