Utilizamos cookies para mellorar a experiencia do usuario e analizar o tráfico do sitio web.

Preferencias

Cando visita calquera sitio web, pode almacenar ou recuperar información a través do seu navegador, xeralmente en forma de cookies. Dado que respectamos o seu dereito á privacidade, pode optar por non permitir a recompilación de datos de certos tipos de servizos. Con todo, non permitir estes servizos pode afectar a súa experiencia.


Galicia rexistrou un mes de xuño húmido e con temperaturas normais

Galicia rexistrou un mes de xuño normal no tocante ás temperaturas e húmido en canto ás precipitacións, xa que choveu de media un 78% máis do habitual neste mes. Estas son as principais conclusións do avance do último informe climatolóxico de MeteoGalicia, que resalta que o pasado xuño foi un período moi marcado polas chuvias e con temperaturas que se moveron dentro dos valores agardados. Porén, houbo algún episodio de aire cálido, como o ocasionado pola masa procedente do norte de África que chegou a Galicia a mediados de mes.

Esta situación mudou a partir do día 19, cando os ventos frescos e húmidos de orixe atlántica substituíron ao aire cálido, o que provocou un descenso notable nos termómetros e algunhas precipitacións. Dende ese momento en adiante, o tempo foi cambiante: houbo chuvascos intermitentes e temperaturas irregulares como consecuencia dos movementos das baixas presións.

Porén, a característica máis destacable do mes hai que buscala nos rexistros de precipitacións que, para tratarse de xuño, foron abundantes. Coas chuvias dos primeiros días xa quedou case cuberta a media normal de todo o mes, que acabou sendo húmido no conxunto de Galicia (aínda que sen superar os valores de 2021). A precipitación media en Galicia foi de 85L/m2, un dato que se duplicou nas comarcas do Xallas e de Caldas, acadando os 180L/m2. Pola contra, os rexistros máis baixos acadáronse en localidades illadas de Valdeorras e Bregantiños, que roldaron os 30Lm2.

No caso das temperaturas, as medias do mes obtidas a partir dos datos das estacións meteorolóxicas máis representativas situáronse en 0,1º C por riba do esperado, o que fai que o mes poida considerarse normal neste aspecto. En todo caso, o comportamento foi moi irregular no conxunto da comunidade galega. Por exemplo, na Baixa Limia (cunha anomalía negativa de 1,3º C) acadáronse os rexistros máis baixos de toda Galicia, mentres que Verín contou coas temperaturas medias máis altas (2º C por riba do habitual).

Comparte esta noticia