Serra do Suído
Serra do Suído, espiña dorsal da comunidade galega
A Serra do Suído forma parte da denominada Dorsal Galega, que percorre o centro da comunidade, e serve de fronteira natural entre as provincias de Pontevedra e Ourense, enmarcándose nos seus terreos os concellos pontevedreses de A Lama, Covelo e Fornelos de Montes e os ourensáns de Avión e Beariz. Este espazo natural enlaza ó norte cos Montes do Testeiro e ó sur cos da Paradanta.
Algunhas das cotas máis altas desta serra atópanse na parte ourensana, no concello de Avión, na Laxa dos Números (1.053 m.) e na Pena de Rairiz (1.043 m.). O Suído é lugar de nacemento de moitos e importantes ríos e regatos tributarios de outros, como o Avia, na vertente ourensana, afluente do Miño e que coas súas augas alimenta o embalse de Alvarellos, ou o Verdugo, o Cubeta ou o Folgoso, na parte pontevedresa, que desembocan directamente na ría de Vigo. É de singular importancia nesta zona a presenza de turbeiras, auténticos reguladores hidrolóxicos.
A vexetación da Serra do Suído caracterízase na súa parte alta polos pastizais, os toxos, os fentos, as xestas, os codesos ou as carqueixas. Nas turbeiras medra o esfagno e nas zonas medias atopamos con certa facilidade arandos silvestres, nos abondosas arandeiras que crecen nesta área. Na parte máis baixa, as árbores caducifolias son as máis características xunto con exemplares de outras especies como eucaliptos, piñeiros bravos, sobreiras e castiñeiros.
A fauna deste espazo natural conta con numerosas especies de aves como o aguiucho pálido, a águia culebreira ou o bufo real. Entre os mamíferos destacan as especies cinexéticas e outras como a xineta, o raposo ou o lobo, de cuxa presenza dan fe os “foxos do lobo”, construccións destinadas á captura deste depredador, composto por dous muros en forma de uve comezando nunha boca angosta, que se vai estreitando ata desembocar nunha foxa profunda (3- 4 metros). Ademais, os pastizais da serra serven de lugar de pasto para a gandeiría en extensivo, sobre todo de vacas e ovellas.
Ver: este espazo natural galego ofrece espectaculares vistas dende o seu alto sobre os vales que o rodean. Un dos seus principais atractivos e das nosas recomendacións son as rutas de sendeirismo que percorren a serra e que permiten coñecer aspectos tan interesantes como os “chozos”, edificacións que se remontan á Idade Media, con grosas paredes de granito e teitos de grandes laxes sobre as que a carriza serve de illante térmico e que usaban os pastores como refuxio. Na vertente pontevedresa as carballeiras son un dos principais puntos de interese, como a da Xesta, no concello de A Lama. As áreas recreativas e as praias fluviais a carón dos diversos ríos que percorren o Suído, tanto no lado ourensán como no de Pontevedra, son outro dos seus principais atractivos.
Chegar: o acceso á Serra do Suído é relativamente sinxelo a través da autovía sur de Galicia ó par que a través da estrada PO-255 que une a localidade de A Cañiza coa cidade de Pontevedra.
Comer: as carnes de caza e os peixes de río, xunto cos produtos derivados do porco, son a mellor representación da gastronomía dos concellos que abrangue a Serra do Suído. Os xamóns destas terras son de gran calidade. Na parte ourensá, a castaña é un dos máximos expoñentes da súa cociña ó que se lle rende tributo todos os meses de outono na festa do Magosto.
Aloxamento: o turismo rural é a mellor opción para facer noite no entorno da Serra do Suído, con numerosas e interesantes casas de turismo rural nas vertentes das dúas provincias que une e separa a un tempo.