Día Mundial de Loita contra a Desertización e a Sequía: Galicia perde unha media de 15 hectáreas anuais de terra
Hoxe conmemórase o Día Mundial de Loita contra a Desertización e a Sequía 2022. A humanidade atópase nun punto crítico no que se refire á xestión das sequías e á desertización, polo que urxe acelerar a súa redución. Así, cada 17 de xuño serve para concienciar aos cidadáns sobre os devastadores efectos que estes fenómenos teñen no medio ambiente e na seguridade das persoas, pois representan graves problemas presentes e futuros. A celebración está centrada na urxencia de adoptar políticas e medidas a escala local, rexional e global para evitar os peores efectos desta catástrofe.
A desertización afecta a todo o planeta e ningún país é inmune á sequía. De feito, España é un dos países europeos máis vulnerables á sequía e á escaseza de auga relacionadas co cambios climático, o que provoca un risco de desertificación. No caso de Galicia, máis do 40% do solo xa está degradado. Algúns dos principais factores que agravan este problema son as talas indiscriminadas, os incendios, os monocultivos, a agricultura e gandería intensivas e a xestión dos residuos. Como consecuencia do cambio climático, a comunidade galega perde unha media de 15 hectáreas de terra cada ano. Por este motivo, o deterioro e o risco de desertización avanzarán para converterse nun problema medioambiental cada vez máis difícil de solucionar.
No Inventario Nacional de Erosión de Solos 2002-2012, o Ministerio de Medio Ambiente xa marcaba en vermello amplas zonas das catro provincias de Galicia. En total, máis de 6.200 quilómetros cadrados do territorio galego están marcados en vermello pola súa extrema erosión, o que supón o 21% de toda a comunidade. Das catro provincias, o peor índice de degradación é o de A Coruña e Lugo, con máis dun 26% da súa superficie cuns niveis de erosión “graves” e “moi graves”. Pola súa parte, en Ourense, a porcentaxe supera o 14%, mentres que en Pontevedra roza o 12%. Por este motivo, é preciso cambiar o modelo de xestión do monte e do tratamento de residuos para evitar que este problema non continúe medrando.