skip to Main Content
As Organizacións Sociais Do Consello Forestal De Galicia Rexeitan Reunirse Con Medio Rural

As organizacións sociais do Consello Forestal de Galicia rexeitan reunirse con Medio Rural

Os axentes sociais que forman o Consello Forestal de Galicia non acudiron a reunión prevista para abordar o Plan de prevención e defensa contra os incendios forestais de Galicia, Pladiga 2020, coa Consellería de Medio Rural.

As organizacións alegan a “falta de participación sectorial e de diálogo social na planificación das políticas forestais e na estratexia contra os incendios”. Explican que a pesar de que o Consello Forestal de Galicia é un órgano colexiado onde se debe asegurar a participación, dende hai anos esta “limítase a un mero trámite para cumprir coa obriga de convocalo”, só para que os procedementos lexislativos e de regulamentación sigan coa súa tramitación.

Por este motivo Amigos da Terra, Asociación Frouma, Federación Ecoloxista Galega, Organización Galega de Comunidades de Montes  e o Sindicato Labrego Galego, tomaron esta decisión “como protesta” e reclamar así unha solución. Neste senso, manifestan que, aínda que nalgunha ocasión se lles trasladou información e se lles dá un prazo para poder contribuír con achegas aos textos, reclaman “un espazo para a socialización do argumentario das distintas organizacións” e a apertura dun “debate real entre estas e a administración”.

Un exemplo delo é o Plan de Prevención e Defensa contra os Incendios Forestais de Galicia (Pladiga) e todo o que se refire á prevención e extinción de lumes forestais. Din que non se lles permite “ningún tipo de participación social” e que só se serven delas para “lexitimar unha política que emana unicamente do goberno da Xunta e relegándoas a simples espectadoras dos procedementos”. Engaden amais, que nesta ocasión foron convocados a última hora, a campaña do dispositivo de extinción está a piques de comezar, e que se lles foi entregada a documentación cun prazo que imposibilitaba analizala en detalle.

 

Back To Top